2020 жылғы 11 қарашада онлайн форматында ҚР Тұңғыш Президенті – Елбасының төрағалығымен Қазақстан халқы Ассамблеясы Кеңесінің отырысы өтті.

2020 жылғы 11 қарашада Қазақстан Республикасының Тұңғыш Президенті – Елбасы, ҚХА Төрағасы Нұрсұлтан Әбішұлы Назарбаевтың төрағалығымен Қазақстан халқы Ассамблеясы Кеңесінің отырысы өтті.

Кеңеске ҚР Президенті Қ.Қ. Тоқаев, орталық мемлекеттік және жергілікті атқарушы органдардың басшылары,
ҚР Парламентінің депутаттары, Нұр-Сұлтан, Алматы, Шымкент қалалары мен облыс әкімдері – ҚХА төрағалары, этномәдени бірлестіктер мен Ассамблея құрылымдарының өкілдері, білім және ғылым мекемелерінің басшылары қатысты.

Іс-шарада Кеңес мүшелері, этномәдени бірлестіктердің өкілдері және ҚХА еріктілері этносаралық келісім саласын одан әрі нығайту бойынша түрлі ұсыныстармен сөз сөйледі.

Отырыс барысында Елбасы Қазақстан халқы Ассамблеясы төрағасының тағайындалған орынбасарлары – «Қазақстан ұйғырларының республикалық мәдени орталығы» Алматы филиалының төрағасы З.П. Кузиевті және ҚХА мүшесі, «Kazakh TV» телеарнасының директоры М.Т. Бекбаеваны таныстырды.

Отырыс соңында Ассамблея Кеңесі Үндеуді қабылдап, онда ҚХА-ның барлық мүшелерін, Қазақстан азаматтарын қоғамдық келісім мен жалпыұлттық бірлікті нығайту жолындағы Елбасының стратегиялық сабақтастық бағытын қолдауға шақырды.

Үндеуде азаматтық бейбітшілік, қоғамдық келісім және халықтың бірлігі біздің еліміздің іргетасы, оның қарқынды дамуының кепілі болғандығы және болып қала беретіні атап өтілді.

ҚХА Кеңесінің қорытындысы бойынша ҚР Тұңғыш Президенті – Елбасы, ҚХА Төрағасы Н.Ә. Назарбаев тиісті іс-шаралар жоспарын әзірлеуді тапсырды.

• 18.11.2020
• 457