Нұрлан Ноғаев "Абысын-ажын"республикалық байқауының жеңімпаздарымен кездесті

Бүгін, 20 шілдеде Маңғыстау облысының әкімі Нұрлан Ноғаев "Абысын-ажын" республикалық байқауының жеңімпаздарымен кездесті, деп хабарлайды Маңғыстау облысы әкімінің баспасөз қызметі.

Түпқараған ауданының Ақшұқыр ауылында тұратын Жауыновтар отбасының 9 бірдей келіні елордада өткен республикалық «Абысын-Ажын» сайысына енесімен бірге қатысып, ұпай санымен де, өнерімен де топ жарып, бас жүлдені иеленіп келген болатын. 

"Дәстүрге жол - қазақ аналары" қоғамдық бірлестігінің Маңғыстау облыстық филиалының басшысы Бибігүл Рамазанова бұл отбасының кездейсоқ таңдалмағанын айтады. Үлкен әулеттен шыққан тату абысындар осы күнге дейін  ұлттық дәстүрдің қаймағын бұзбай, сақтап келе жатыр, енелеріне деген құрметі де шексіз. 

Кездесу барысында өңір басшысы қатысушыларды жеңісімен құттықтап, олардың өзгелерге үлгі екенін атап өтті.

- Құрметті Қымбат апа, мен сізді және сіздің отбасыңызды жеңістеріңізбен шын жүректен құттықтаймын. "Қазақ аналары дәстүрге жол" республикалық бірлестігі ұйымдастырған "Абысын-Ажын" байқауында сіздер біздің облыстың абыройын асырып, ұлттық салт-дәстүрімізді дәріптей білдіңіздер. 9 келінің басын қосып, оларға бар білгеніңізді үйрету - оңай жұмыс емес. Сіздің тәрбиеңізді көрген келіндеріңіз сіз секілді ақжаулықты ана атанып, қазақ халқының барлық келіндеріне үлгі болсын! Отбасыңызға амандық тілеймін! - деді Нұрлан Ноғаев.

Кездесуден кейін өңір басшысы "Абысын-Ажын" республикалық байқауының қатысушылары мен ұйымдастырушыларын алғыс хатпен марапаттады.

• 20.07.2022
• 285