Аймағымызда белсенді азаматтар мен тұрғындардың арқасында аула спорты қанат жайып келеді

Біз бұған жүйелі түрде қол жеткіздік. Соңғы жылдары облыс бойынша жүздеген спорт алаңдары мен корттар орнатылды. Облыста барлығы 2682 спорт ғимараты жұмыс істейді. 2021 жылы 65 алаң, 11 хоккей корты және 23 стрит-воркаут алаңы орнатылды. Биыл жоспар бойынша 20-дан астам нысан орнатылады. Оның ішінде 9 спорт алаңы, 9 корт және 3 стрит-воркаут алаңы бар. Сонымен қатар мұндай алаңдар облыс орталығының қараусыз қалған жерлерінде де орнатылады.

Ал осы жазда Қарағандының «Шахтер» стадионы «Спорт әр аулаға» атты жаңа жобаны қолға алды. Жобаға бірінші кезекте қаладағы 22 көше спорт алаңдары кірді. Мұнда тәжірибелі нұсқаушылар барлық адамдар үшін тегін жаттығуларды өткізеді. Бұл үшін тиісті спорттық құрал-жабдықтар сатып алынды.

Әр жас мөлшеріндегі балаларға арналған жаттығулар, қажетті ойындар жүйесі әзірленді. Таңертеңгілік бағдарламаға фитнес-жаттығулар мен ЖДД жаттығулары, ересектер мен балаларға арналған zumba, кәсіби спортшылардың шеберлік сыныптары кіреді. Орталық саябақ пен Жеңіс саябағында скандинавиялық серуендеу сабақтары өтеді. Ал кешке спорттық турнирлер ұйымдастырылады.

Бұл идеяны теміртаулықтар да қолдады. Металлургтер қаласында AulaFit әлеуметтік бағдарламасы жұмыс істейді. Оның бастамашысы бокстан Олимпиада чемпионы Серік Сәпиев. Тегін жаттығулар жаз бойына қаланың алты спорт алаңында өтеді.

Ал Балқашта тұрғындарды салауатты өмір салтына тарту идеясын жергілікті студенттер іске асыруда. Ақтілек Қанатбек пен Диас Балғабаев М.Хамзин атындағы Металлургтер мәдениет сарайының жанындағы алаңда стрит-воркаут бойынша тегін жаттығуларды өткізеді.

Мұндай белсенді алаңдар тек қалаларда ғана емес, ауылдарда да болады деп сенемін. Бұл ретте біз қоғамдық бастамаларды қолдауға дайынбыз.

• 04.08.2022
• 262