Приозерск қаласының тұрғындарымен кездесу

Наурыз айында өткен кездесуде ағымдағы мәселелерден басқа Приозерск қаласының тұрғындары үш негізгі мәселеге алаңдаушылық білдірген еді. Олар: ДШСК, Мәдениет үйі құрылысы, стадионды жөндеу. Осы үш ірі жобаны біз облыстық бюджеттен қолдадық.

ДШСК бойынша конкурс жарияланды. Мердігерді анықтағаннан кейін 2 жылға есептелген жұмыстар басталады.

Мәдениет үйі бойынша жобалық-сметалық құжаттама әзірленеді. Ол келесі жылы салына бастайды.

Салынғанына 50 жылдан асқан қалалық стадионда трибуналар ауыстырылады, футбол алаңы жаңартылады, тартан жүгіру жолдары төселеді, хоккей корттары, воркаут алаңдары орнатылады.

Бизнес нысандарын орталық жылумен жабдықтауға қосу бойынша жұмыстар жасалып жатыр.

Биыл қалалық қонақ үйлердің біріне жылу беріліп, келесі жылы тағы бірнеше ШОБ нысандары жылу жүйесіне қосылады.

Қалада жасыл желектер көбейгені қуантады. Мұнда 6000-ға жуық ағаш пен 18 мың бұта отырғызылды. Тамшылатып суару арқылы жаңа суару жүйесі орнатылды.

Қалалық жағажай аумағында волейбол және футбол алаңдары, воркаут-аймақтар, балалардың ойын кешендері пайда болады.

«Нұрлы жер» бағдарламасы бойынша биыл әлеуметтік осал санаттағы 90 отбасы үшін бес қабатты екі үй пайдалануға беріледі.

Сондай-ақ, жеке қабылдау өткіздім. Тұрғын үй құрылысын жалғастыру, жолдарды жөндеу мәселелері талқыланды. Сол сияқты, «Балбөбек» балабақшасы блогының құрылысын аяқтау туралы мәселе көтерілді. Әр мәселе бойынша нақты тапсырмалар бердім.

• 12.08.2022
• 331