Ақтөбе облысында жергілікті бюджет есебінен гранттар бөлінді

19 тамызда Ақтөбе облысының әкімдігінде жаңа 2022-2023 оқу жылына жергілікті бюджет есебінен жоғары білімді мамандар даярлауға гранттар тағайындау жөніндегі комиссияның отырысы өтті.

67 адам грант иегері атанды. Олардың барлығы облыстың еңбек нарығында тапшы мамандықтарды меңгеретін болады. Облыстық грантқа барлығы 230 адам өтініш білдірген. Айта кету керек, шет (ағылшын) тілі мұғалімі және дене шынықтыру пәні мұғалімі мамандықтарына бәсекелестік жоғары болды.

Ережеге сәйкес, жергілікті атқарушы органның мемлекеттік тапсырысы бойынша жоғары оқу орнын бітірген маман облыстың кез келген елді мекенінде мамандығы бойынша кемінде 5 жыл жұмыс істеуі керек.

Грант иегерлерінің тізімі білім басқармасының ресми аккаунттарында жарияланады. Олар 25 тамызға дейін аталған университеттерде оқуға құжаттарын тапсырулары тиіс.

• 24.08.2022
• 223