Маңғыстауда Асанәлі Әшімовтің 85 жылдығына арналған қойылым сахналанды

23 тамыз күні Н.Жантөрин атындағы Маңғыстау облыстық музыкалық-драма театрының сахнасында Асанәлі Әшімовтің 85 жылдығына арналған "Тағдыр тақтасы" қойылымы сахналанды, деп хабарлайды Маңғыстау облысы әкімінің баспасөз қызметі. 

Қойылымға халық әртісі Асанәлі Әшімов, жұбайы Бағдат Әшімова, сондай-ақ мерейтой иесінің өнерін бағалаушы көрермендер, мәдениет және өнер қайраткерлері, шығармашылық топ өкілдері және Ақтау қаласының тұрғындары мен қонақтары қатысты.

Қойылым қазақ сахна және кино өнерінің абызы Асанәлі Әшімовтің 85 жылдық мерейтойына арналды.

Асанәлі Әшімовтың өмір жолын суреттейтін "Тағдыр тақтасы" қойылымын маэстроның өз шәкірттерінен құрылған «Жаңа ғасыр» театрының әртістері сахналады. 

Бұл драма - Алаштың абыз тұлғасына айналған Асанәлі Әшімовтың шығармашылығы мен өміріне арналған. Өмірдің ащысын да тәттісін де тата жүріп, өнердің бақ пен сорын қатар артса да қайыспаған тұлғаның қайсарлығына арналған.  "Жаңа ғасыр" театрының әртістері жоғарыда аталған сезімдерді көрермендерге шынайы жеткізе білді. 

Спектакль аяқталғаннан кейін аймақ басшысы Нұрлан Ноғаев өз сөзінде Асанәлі Әшімовтің театр және кино өнеріне қосқан өлшеусіз үлесін атап өтті.

- Біз сіздерді қасиетті Маңғыстау жерінде көргенімізге қуаныштымыз. Қазақ мәдениеті мен өнерінің тарихы өте бай. Халқымыздың рухани бай мұрасында танымал тұлғалар көп. Соның ішінде Асанәлі Әшімовтің есімі алтын әріптермен жазылған. Сіздің адамгершілігіңізді, талантыңызды, шығармашылығыңызды халық мойындайды және сізге көрермендеріңіздің ыстық ықыласы ерекше. Қазақтың әр баласы сіздің фильмдеріңізді көріп өсті.  Сіздің бейнеңіз, дауысыңыз көрермен санасында жаттаулы. Өміріңіздің 85-ші белесіне келсеңіз де, әлі күнге дейін өнеріңізді жалғастырып келесіз. Сіз өмір жолыңызда төзімділік пен шыдамдылықтың үлгісін көрсете білдіңіз. Президент Қасым-Жомарт Тоқаев атап өткендей, сіз бүкіл әлемнің ыстық ықыласына бөленген жансыз. Маңғыстаулықтардың атынан сізге және шәкірттеріңізге отандық өнер саласына қосқан үлестеріңіз үшін алғысымды білдіруге рұқсат етіңіздер. Сізді мерейлі мерейтойыңызбен шын жүректен құттықтаймын! Зор денсаулық және шығармашылық табыс, отбасыңызға амандық, қуаныш пен жан тыныштығын тілеймін, - деп атап өтті Нұрлан Ноғаев

Салтанатты кеште Асанәлі Әшімов ұлымен бірге "Жан балам" әнін орындап, сонымен қатар облыс тұрғындарына алғысын білдірді.

• 24.08.2022
• 262