Ақтауда Шотан батырға арнап ескерткіш орнатылды

28 тамызда Ақтауда Шотан батырға арналған мемориалдың ашылу салтанаты өтті, деп хабарлайды Маңғыстау облысы әкімінің баспасөз қызметі. 

Батыр бабамыздың ескерткішінің ашылу салтанатына өңір басшысы Нұрлан Ноғаев, Қазақстанның халық әртісі Асанәлі Әшімов, депутаттар, қоғам белсенділері, Шотан батыр ұрпақтары және қала тұрғындары қатысты. 

Алдымен Шотан Назарұлының рухына құран бағышталды. 

- Шотан Назарұлы - Жоңғар шапқыншылығында жерімізді жаудан азат еткен батырларымыздың бірі, кіші жүздің тумасы. Батырдың бүгінгі ұрпақтары оның ерлігін мақтан тұтады. Бүгін  өңір үшін ең маңызды тарихи күннің куәсі болып отырмыз. Біздің ортақ міндетіміз — батыр бабаларымыздың ерлігін кейінгі ұрпаққа дәріптеу. Мемлекет Басшысы Қасым-Жомарт Тоқаев өзінің Қазақстан халқына Жолдауында елі, жері үшін күрескен, ұлан-ғайыр атырапты жаудан қорғаған батыр ата-бабаларымыздың ерлігін мәңгі есте сақтау керектігін атап өтті. Сондықтан ерлеріміздің даңқын асқақтатып, салт-дәстүрімізді қоса ұлықтауымыз керек. Кең байтақ жерімізді жаудан азат етіп, еліміздің болашағы үшін тәуелсіз тұтастығымыз жолында күрескен ата-бабаларымыздың көзсіз ерлігі біз үшін әрқашан үлгі,- деп атап өтті Нұрлан Ноғаев

Тарихқа көз жүгіртсек, Жоңғар шапқыншылығы кезінде Ер Шотан Абылай хан мен Әбілқайыр ханның сенімді серігі болған. Ол Қабанбай, Бөгенбай, Өтеген сынды батырлармен  бірге қазақ жерін жаудан қорғаған.

Бүгінгі ескерткіш Шотан батыр ұрпақтарының бастамасымен және кәсіпкерлердің қолдауымен орнатылды. 

Әуежай жолының қиылысында бой көтерген ескерткіштің авторы - суретші, мүсінші Көшер Байғазиев. 

Монументтің биіктігі - 12 метр, салмағы - 5 тонна. Ескерткіштің құрылысы 2021 жылы басталған болатын. 

Шара соңында Нұрмұхан Жантөрин атындағы Маңғыстау облыстық драма театрының әртістері ескерткіштің ашылу салтанатына келген қонақтар үшін өз өнерлерін ортаға салды.

• 31.08.2022
• 223