Құрметті Маңғыстау облысының тұрғындары мен қонақтары!

Сіздерді Қазақстан Республикасының Мемлекеттік мерекесі - Конституция күнімен құттықтаймын!

Конституция күні – еліміз үшін маңызды мерекелердің бірі. 1995 жылы 30 тамызда еліміздің негізгі Ата Заңы қабылданды. Бұл Қазақстан азаматтары үшін республика дамуының жаңа беттерінің басталуын білдіретін, ерекше оқиға болды.
Конституция, жалпы тарихы тағдырмен байланысқан Қазақстан халқының бірлігін нығайта түсті.
Конституцияның өзекті ережелеріне сүйене отырып, ел тағдыры үшін өмірлік маңызы бар жаңарулар жүргізілді, нарықтық тұрақты экономика құрылды. Біз демократиялық қоғамның негізін қаладық. Қазақстан дүние жүзілік аренаға танымал болды және әлемдік экономикалық жүйеде лайықты өз орнын алды.
Біз ұлан-ғайыр, байтақ даланы ақ білектің күшімен қорғап қалған батыр бабаларымыздың асқақ аманатына адал болуымыз керек. Олар біртұтас аумағы бар еркін ел, қуатты мемлекет құрғысы келді. Біздің ұрпағымызға осы арманды жүзеге асыру бақыты бұйырды.
Мемлекет басшысы Қасым-Жомарт Тоқаевтың бастамасымен осы жылдың 5-маусымында елімізде айрықша мәні бар тарихи оқиға болды. Мемлекетіміз  дамудың жаңа кезеңіне қадам басты. Ата заңымызға ұсынылған өзгерістерді  азаматтардың басым көпшілігі қолдады. Оның ішінде біздің  облысымызда 248 мыңнан астам азамат референдумға қатысып, азаматтық позициясын білдірді.
Азаматтарымыз зор жауапкершілік танытты және отансүйгіштік қасиетін паш етті. Біз Жаңа, Әділетті Қазақстанды құру жолындағы бірлігіміз бекем екенін көрсеттік. Конституциялық түзетулер мемлекеттігіміздің тұғырнамасын түбегейлі өзгертіп, бүкіл қоғамның дамуына тың серпін береді деген сенімдеміз. Әр азаматымызға дәулетті өмір сүруге, Отанымызды әлемнің озық елдерімен теңестіруге жағдай жасайтын басты құжат – Ата Заң екендігін лайым есте сақтау – міндет, бас құжатқа лайықты құрмет көрсету арқылы Отанын сүйетін ұрпақ тәрбиелей білу – парыз.
Қадірлі жерлестер!
Мереке қарсаңында Отанымыздың жарқын болашағы үшін осы жолда бірігіп қызмет етіп, қолдау білдіріп жүрген сіздерге ризашылығымды білдіремін!

Баршаңызды шын жүректен тағы да мерекемен құттықтаймын!

Сіздерге зор денсаулық, бейбіт өмір, жақсылық және табыс тілеймін!

Құрметпен, Маңғыстау облысының әкімі Нұрлан Ноғаев

• 31.08.2022
• 276