Ералы Тоғжанов өңірде өрт қауіпсіздігін қамтамасыз ету сұрақтары бойынша алдын алу жұмыстарын күшейтуді тапсырды

Бүгін Ақтөбе облысының әкімі Ералы Тоғжановтың төрағалығымен өртке қауіпті кезеңнің өтуіне байланысты жиын өтті.

Жиынды ашқан өңір басшысы Қостанай облысындағы тілсіз жаудан зардап шеккендерге арналған гуманитарлық жүк тиелген алғашқы керуенді жөнелтуге көмектескен бір топ кәсіпкер азаматтар мен ерікті студенттерге алғысын білдірді.

«Кеше зардап шеккен қостанайлықтарға Ақтөбе облысынан азық-түлік, киім-кешек пен басқа да қажетті заттар жіберілді. Гуманитарлық көмек Қостанай облысының әкімдігімен келісе отыра жасалды. Біз әрі қарай да барлық қажетті қолдауды көрсететін боламыз. Бей-жай қарамаған әрбір ақтөбелікке алғыс айтамын»,- деді Ералы Тоғжанов. Сонымен бірге, Ақтөбе облысында да өрт қауіптілігі әлі де жоғары. Осы жылдың сегіз айы ішінде өңір аумағында 379 өрт тіркелген. Ірі табиғи өрттер Мәртөк, Әйтеке би, Қобда және Хромтау аудандарында орын алды. Жуырда жеті ауданда бірдей дала өрті тіркелді. Төтенше жағдайлар департаментінің басшысы Марғұлан Аманбаев тергеу шаралары өрттің себебін, шығыны мен кінәлі тұлғаларды анықтап жатқанын жеткізді. Өртті ескертіп, сөндіру мақсатында елді мекендерде құрамында 2100-ден аса адамы бар 322 ерікті өртке қарсы құрылымдар жұмыс жасауда.

Құрылымдардың жеткілікті дәрежеде жабдықталмағанын атап өткен облыс әкімі Ақтөбе қаласы мен аудан әкімдеріне еріктілерге өрт сөндіретін мотопомпалар, аспалы өрт сөндіргіштер, арнайы киімдер мен өрт сөндіретін тіркемелі бөшкелер сатып алу жоспарының жүз пайызға орындалуын қамтамасыз етуді тапсырды. Сондай-ақ, елді мекендерді өрт сөндіретін резервуарлармен қамтамасыз ету жұмыстарын жандандырып, осы күннің соңына дейін әр аудандағы өртке қарсы техникалар мен имараттардың жағдайы туралы ақпаратты өзекті етуді тапсырды.

Облыс әкімі: «Дала өрті орын алған жағдайда біз жалынның таралуына жол бермейтін жедел шараларды қабылдауымыз керек. Бұдан бөлек, жалған ақпараттың таралуына жол бермеу мақсатында халықты уақытылы ақпараттандыру жұмыстарын күшейту қажет»,- деп атап өтті. Бұдан бөлек, өңір басшысы облыс аумағында жетіспейтін 14 өрт сөндіру бекетін құру міндетін қойды. Қазіргі таңда 36 өрт сөндіру бекеті жұмыс жасап тұр, бұл қазіргі қажеттілікті  74,4 % қанағаттандырады.

• 06.09.2022
• 207