Ералы Тоғжанов Ақтөбе облысында автомобиль жолдарының дамуын тежейтін проблемаларды қысқа мерзімде шешуді тапсырды

Ақтөбе облысының әкімдігінде жол жобаларын іске асыруға қатысты мәселелер талқыланды.

Кеңеске мемлекеттік органдардың басшылары, аудандар мен Ақтөбе қаласының әкімдері, мердігерлік ұйымдардың өкілдері қатысты.

"Жолдарды салу және жөндеу бойынша жұмыстарды сапалы жүргізу ерекше бақылауда. Жол нысандарын пайдалануға уақытылы және сапалы тапсыруды қамтамасыз ету үшін бар проблемаларды шешудің барлық жолдарын қарастыру қажет", - деп атап өтті облыс әкімі.

Өңірде ұзындығы 303 км "Ақтөбе-Атырау-РФ шекарасы (Астраханьға)" республикалық маңызы бар автожолын қайта жаңарту бойынша 6 жоба іске асырылуда.

Ағымдағы жылы 203 жоба жүргізілуде, оның шеңберінде 663 км.автожолды, оның ішінде 80 км. облыстық, 412,4 км. аудандық жолдарды, 197 көшені немесе 170,3 км. қалалар мен аудандардағы көше-жол желісін жөндеу жоспарлануда.

Сондай-ақ, "Ақтөбе қаласының батыс айналма жолы" а/ж 7-17 км және "Донское-Бадамша-Ақтөбе-Орск" а/ж 45-75 км учаскелерін реконструкциялау, "Покровка-Темір-Кеңқияқ-Ембі" а/ж 78-84 км учаскесі мен 0-78 км, 84-111 км учаскелерін орташа жөндеу бойынша және т.б. жобаларды іске асыру басталды.

Орындалған жұмыстардың нәтижелері бойынша 2023 жылдың басында жақсы және қанағаттанарлық жағдайдағы жергілікті маңызы бар автомобиль жолдарының үлесі 72% - ды құрайтын болады.

​Бұдан бөлек, жолаушылар көлігі және автомобиль жолдары басқармасының басшысы, сондай-ақ мердігерлік ұйымдардың өкілдері бірқатар проблемалық мәселелерді атап өтті. Олардың ішінде инертті материалдарды, битумды тасымалдау үшін теміржол вагондарына қажеттілік, газбен жабдықтау желілерін қайта құру және т. б. бар.

Жиын соңында облыс әкімі мердігерлерге жолдың бұзылуы, сапасыз салынуы немесе жөнделуі үшін жеке жауапкершілік туралы ескертті. "Мен бұл мәселені қатаң бақылауда ұстаймын", - деп қорытындылады Ералы Тоғжанов.

• 06.09.2022
• 183