Ақтауда бір мезетте 100 тақтада шахмат ойыны өтті

2 қыркүйек күні Каспий теңізінің жағалауында бір мезетте 100 шахмат тақтасында ойын өтті, деп хабарлайды Маңғыстау облысы әкімінің баспасөз қызметі.

Шараға арнайы қатысқан Өзбекстан құрамасының ойыншылары оқушыларды оқу жылының басталуымен құттықтап және шахматтан әлем чемпионы Бибісара Асаубаевамен бірге Ақтау қаласының жас шахматшылары үшін 100 тақтада бір мезгілді ойын сеансын өткізеді.

Іс-шараға облыс әкімінің орынбасары Ұлықбек Тінәлиев, ҚР Спорт және дене шынықтыру істері комитетінің төрағасы Самат Ералиев, Өзбекстанның Ақтау қаласындағы Бас консулы Атабек Тұрсынбеков, Маңғыстау облыстық шахмат федерациясының вице-президенті Бердіқожа Боранбаев және Маңғыстау облыстық шахмат федерациясының вице-президенті Анвар Шайхымов қатысты.

Айта кету керек, Өзбекстан құрамасының ойыншылары жақында ғана сенсация жасап, Үндістандағы шахмат олимпиадасының жеңімпаздары атанды.

Сонымен қатар олар 17 қыркүйекте Астанада өтетін ФИДЕ әйелдер Гран-приінде Бибісара Асаубаеваға қолдау көрсетуге келді.

Бибісара Асаубаева әйелдер арасында Азияның ең үздік шахматшысы атанған болатын. Сондай-ақ ол шахматтан ересектер арасында өткен әлем чемпионатында Қазақстан тарихында бұрын болмаған алғашқы алтынды иеленген еді. Сонымен қатар Бибісара әлем тарихында шахматтан ең жас чемпион.

Өз кезегінде облыс әкімінің орынбасары Ұлықбек Тінәлиев аймақ басшысы Нұрлан Ноғаевтың атынан спортшыларды жеңістерімен құттықтап, алдағы жарыстарда сәттілік тіледі.

- Құрметті спортшылар, киелі Маңғыстау өңіріне қош келдіңіздер! Шахмат – ертеде пайда болған танымды да, қызықты спорт ойыны. Биыл Үндістанда өткен шахматтан дүниежүзілік олимпиадаға 2000-нан астам қатысушы, оның ішінде 189 ерлер командасы және 162 әйелдер командасы жиналғаны мәлім. Қазақстан құрамасының Дүниежүзілік шахмат олимпиадасындағы нәтижесі де бізді қуантты, қыздар құрамасы 5 орынды иеленді. Ал ұлдар құрамасы 17 орында, бұл да жетістік деп білемін. Біз үшін Қазақстан құрамасында өнер көрсеткен маңғыстаулық Бибісара Асаубаева - үлкен мақтаныш. Ол 2021 жылдағы Азияның ең үздік шахматшысы атанды,- деп атап өтті Ұлықбек Тінәлиев.

Айта кетейік, 2026 жылы Дүниежүзілік шахмат олимпиадасы 2022 жылғы чемпиондардың отаны - Өзбекстан елінде өтеді.

• 07.09.2022
• 192