Маңғыстау облысының делегациясы Қостанай облысына барды

Қостанай облысындағы орман өрті болған жерге Маңғыстау облысынан делегация барды.

Делегацияны Ақтау қаласының әкімі Нұрдәулет Қилыбай, сондай-ақ құрылыс компанияларының құрылтайшылары Жұмабай Әділбеков пен Иса Бимырзаев басқарды. Делегация сапары барысында орман өртінің салдары туралы ақпарат жеткізілді. Ақтау қаласының әкімі облыс әкімі Нұрлан Ноғаев пен тұрғындардың атынан осы қиын-қыстау кезеңде қостанайлықтарға шынайы ықылас пен қолдау білдіретіндерін жеткізді.

"Өңір басшысының тапсырмасы бойынша Біз Қостанай облысына келіп, Әулиекөл ауданына бардық. Жағдайды өз көзімізбен көріп, бірнеше зардап шеккен тұрғындармен кездестік. Өкінішке орай, өрт бірнеше мың адамды эвакуациялауға мәжбүр етті, мыңдаған ғимараттар жарықсыз қалды, үйлер қирады. Бұл трагедия ешкімді бей-жай қалдырмады. Бүкіл ел бойынша зардап шеккендерге қаражат пен заттар жинау ұйымдастырылды. Маңғыстау облысы да қалыс қалмады. Тұрғындар осы қиын-қыстау кезеңде қостанайлықтарға шынайы ықылас пен қолдау білдіріп, жылы лебіздерін білдіруде", - деді Ақтау қаласының әкімі Нұрдәулет Қилыбай

Жұмыс сапары барысында Маңғыстау облысының делегациясы Қостанай облысының әкімі Архимед Мұхамбетовпен кездесті. Ол жұмыс тобына және Маңғыстау облысының барлық тұрғындарына көрсеткен қолдауы үшін алғысын білдірді.

• 07.09.2022
• 281