ІІМ-де Президент Жолдауы талқыланды

Күн тәртібінде екі мәселе – Мемлекет басшысының Қазақстан халқына Жолдауында көрсеткен тапсырмаларын іске асыру бойынша қабылданып жатқан шаралар және сегіз айдағы жедел-қызметтік жұмыстың нәтижелері қаралды.

Мемлекет басшысы 1 қыркүйекте Парламент Палаталарының бірлескен отырысында Қазақстан халқына “Әділетті мемлекет. Біртұтас ұлт. Берекелі қоғам” Жолдауын жариялады. Президент алдағы бірқатар саяси және әлеуметтік-экономикалық өзгерістерді айтып кетті.  Оларды іске асыру шаралары Президент Әкімшілігі мен Үкімет отырысында талқыланды. Нақты бағыттар бойынша жұмысты ұйымдастыру үшін мемлекеттік органдар арасында арнайы жұмыс топтары құрылады. Алда жасайтын жұмыс көп. Мемлекет басшысы реформаның 5 нақты бағытын атады.

Еліміздің экономикалық ахуалын жаңғырту сияқты үлкен міндеттермен қатар Президент қоғамдағы зорлық-зомбылық деңгейін төмендету және құқық бұзушылықтар мен қылмыстарға тиімді қарсы іс-қимыл жасау міндетін қойып отыр.

Айта кету керек, Мемлекет басшысының бастамалары барлық мемлекеттік органдар мен қоғамдық институттарға үлкен жауапкершілік жүктейді, осы өзгерістердің барлығында да құқық қорғау органдарының, әсіресе полицияның рөлі зор.

• 07.09.2022
• 366