Ералы Тоғжанов Ақтөбе қаласы мен аудан әкімдеріне жылыту маусымына дайындық жұмыстарын күшейтуді тапсырды

Ақтөбе облысының әкімі Ералы Тоғжанов жылыту маусымына дайындық мәселесі бойынша жиын өткізді.

Жиынға мемлекеттік органдардың басшылары, облыс аудандары мен қалаларының әкімдері, коммуналдық кәсіпорындардың өкілдері қатысты.

Облыстық Энергетика және тұрғын үй-коммуналдық шаруашылығы басқармасы басшысының мәліметінше алдағы жылыту маусымына дайындық жұмыстары жоспар бойынша жүріп жатыр. Қазіргі таңда әлеуметтік нысандар мен көппәтерлі тұрғын үйлерді, қазандықтарды, жылу, су-кәріз және электр желілерін жөндеу жұмыстары 99 пайыз аяқталды. Бюжеттік ұйымдар үшін алдағы жылыту маусымына 33 455 тонна көмір мен 1 787 тонна дизель отыны дайындалды. Тұрғындарға 25 мың тонна көмір қажет. Облыс басшысы қатты отын қорын жасауды тездетіп, тұрғындармен көмірді салқын түскенге дейін алдын ала сатып алып қою қажеттігі жайында түсіндіру жұмыстарын жүргізуді тапсырды. Бұл дүрлігуді болдырмай, жеткізу жағынан проблема туғызбауға мүмкіндік береді.

Ералы Тоғжанов: «Жылыту маусымына дайындық барысы үнемі бақылауда болуы тиіс»,- деп атап өтті.

Бұдан бөлек, өңір басшысы әлеуметтік нысандардың қазандықтарын резервті электр көздерімен қамтамасыз ету жұмыстарын жандандыруды тапсырды. Бүгінде облыстың жеті ауданында әлеуметтік нысандар резервті қуат көздерімен 80 - 95,8 пайыз ғана қамтылған.

• 07.09.2022
• 329