Ералы Тоғжанов ауыл шаруашылығын дамыту мәселесін қатаң бақылауда ұстауды тапсырды

Бүгін жиында астық жинау науқанының барысы мен суармалы жерлерді игеру мәселесі қаралды. Жиынға бірқатар мемлекеттік органдардың, қаржы институттарының басшылары қатысты. Ауыл шаруашылығы басқармасының басшысы Исатай Еспағанбетов баяндама жасады.

Биыл Ақтөбе облысында ауыл шаруашылығы дақылдарының егіс алқабы 717,9 мың гектарды құраса, оның ішінде 367,8 мың гектар – дәнді дақылдар. Бүгінде 188 мың гектар астық жиналды, бұл орылған алқаптың 51,1 пайызын құрайды. Әр гектардан орта есеппен 15 центнерден өнім алынса, 282,4 мың тонна астық жиналды. Ауа райы жаңбырсыз болған жағдайда егін жинау жұмыстары қыркүйектің үшінші онкүндігінде аяқталады деп күтілуде. Ауыл шаруашылығы тауарын өндірушілерді дизель отынымен қамтамасыз ету сұрақтарыне ерекше назар аударылды. Күзгі астық жинау жұмыстары кезеңіне 11 мың тонна қажет. Бүгінде шаруаларға 6,7 мың тонна немесе жалпы көлемнің 61 пайызы жіберілді.

Облыс әкімі Ералы Тоғжанов ауыл шаруашылығы тауарын өндірушілерге дизельдік отынның уақытылы және үздіксіз жеткізілуін қамтамасыз етуді тапсырды. Суармалы жерлердің игерілуі ерекше бақылауда. Облыс бойынша суармалы жерлердің жалпы аумағы 30,2 мың гектарды құрайды. Өңір басшысы Қарғалы және Хромтау аудандарындағы республикалық бюджет есебінен қалпына келтірілген жалпы аумағы 1693 гектар болатын суармалы жерлердің мақсатты пайдаланылуын қамтамасыз етуді тапсырды. Бұдан бөлек, облыс әкімі жайылымдарды суландыру үшін бұрғылау және барлау жұмыстарын қажет ететін шаруа қожалықтарын анықтап, қаржыландырылуын қарастыруды, жергілікті ауыл шаруашылығы тауарын өндірушілерге өнімді өткізуде қолдау көрсетуді тапсырды.

Ералы Тоғжанов: «Ауыл шаруашылығы – маңызды стратегиялық бағыттардың бірі. Ауыл шаруашылығының қарқынды дамуы – азық-түлік қауіпсіздігінің кепілі. Бүгін жиналыста талқыланған сұрақтар үнемі қатаң бақылауда болу керек»,- деп атап өтті.

• 07.09.2022
• 279