Ералы Тоғжанов «Ауыл АМАНАТЫ» жобасын іске асыру бойынша шаралар қабылдауды тапсырды

Ақтөбе облысының әкімі Е. Тоғжанов ҚР Парламенті Мәжілісінің депутаттары Жұлдыз Сүлейменова және Гүлдара Нұрымовамен кездесті. Мәжілісмендер өңірге бүгін, 8 қыркүйек күні Мәртөк ауданында өтетін «Ауыл әйелінің елді дамытудағы рөлі» атты форумға қатысу үшін келген. Кездесу барысында мемлекет басшысының тапсырмасы бойынша 2025 жылға дейін халықтың табысын арттыру бағдарламасы аясында өңірлерде жүзеге асырылатын «Ауыл АМАНАТЫ» жобасының негізгі бағыттары талқыланды.

Облыс әкімі: «Ауыл шаруашылығын дамыту – ел президенті «Әділетті мемлекет. Біртұтас ұлт. Берекелі қоғам» атты Жолдауында алдымызға қойып отырған негізгі міндеттердің бірі. Біз азық-түлік қауіпсіздігін қамтамасыз ету, өндірісті ұлғайту және ауыл шаруашылығы өнімдерінің қосымша құнын арттыру жұмыстарын күшейтуіміз қажет. Жоба өзінің тиімділігін көрсетіп, өңір тұрғындарына өз әл-ауқаттарын көтеруге мүмкіндік беретініне сенімдімін»,- деп атап өтті.

Депутаттар «Ауыл АМАНАТЫ» жобасын жүзеге асырудағы негізгі тәсілдеріне тоқталды:

ауыл тұрғындары өз бизнестерін дамытуға жеңілдетілген несие алып, техниканы лизингке рәсімдей алады;

несиені әлеуметтік кәсіпкерлік корпорациялары арқылы рәсімдеуге болады;

ауыл тұрғындарына шектеу қойылмайды – қаражатты тек мал ұстауға, дақылдар өсіруге немесе ауыл шаруашылығы өнімдерін өңдеуге ғана емес, сонымен қатар, наубайхананы, кондитерлік дүкенді және т.б. іске қосуға да алуға болады;

Жоба 2023-2025 жылдар арасында барлық өңірлерде жұмыс жасайтын болады. Қазіргі таңда мобильдік топтар ауыл тұрғындары арасында түсіндіру жұмыстарын жүргізіп жатыр.

Кездесу соңында өңір басшысы жобаны жүзеге асыратын пилоттық ауылдарды іріктеу, ауылдарды скринингтен өткізу, халыққа жобаны жүзеге асырудағы негізгі шарттар мен ауыл шаруашылығы кооперативтерін құру форматын түсіндіру бойынша бірқатар тапсырмалар берді.

• 08.09.2022
• 341