ЕЛДІҢ ДАМУЫНА ҮЛЕС ҚОСҚАН ҮЕҰ СЫЙЛЫҒЫНЫҢ ЖЕҢІМПАЗДАРЫ АНЫҚТАЛДЫ

2020 жылғы 19 қарашада Ақпарат және қоғамдық даму министрі А.Балаеваның төрағалығымен ҮЕҰ-ға арналған сыйлық беру жөніндегі конкурстық комиссияның отырысы өтті. Конкурс комиссиясының құрамына Парламент Сенатының депутаттары Б.Жұмағұлов, Д. Нұржігіт, «Қазақстанның Азаматтық Альянсы» ЗТБ президенті Б. Нұрғазиева және коммерциялық емес, корпоративтік және бизнес-сектордың өкілдері кірді.

2017 жылдан бастап сыйлық республикалық, салалық және өңірлік деңгейлерде әлеуметтік мәселелерді шешуге қосқан үлесі үшін 15 бағыт бойынша 185 ҮЕҰ-ға берілді.

Конкурстық комиссияның отырысына келіп түскен 109 өтінім бойынша алдын ала бағалау қорытындылары шығарылды, оларды азаматтық қоғам өкілдері, БАҚ, қоғам қайраткерлері қатарынан жұмыс тобының 63 тәуелсіз сарапшысы 1-кезеңде қарады.

Нәтижесінде конкурстық комиссия мүшелері ҮЕҰ сыйлығының 38 жеңімпазын анықтау туралы шешімді қолдады. Олардың есімдері ағымдағы жылдың 27 қарашасында IX Азаматтық форумның жабылуында айтылады.

Конкурстық жобаларды талқылау барысында Ақпарат және қоғамдық даму министрі Аида Балаева цифрлық технологияларды дамытуды ескере отырып, сыйлық беру тетігін жетілдіру қажеттігін атап өтті.

• 20.11.2020
• 331