Маңғыстау облысының әкімі ЕҚДБ өкілдерімен кездесті

13 қыркүйекте Маңғыстау облысының әкімі «Еуропалық қайта құру және даму банкі» компаниясының вице-президенті Алан Пию бастаған өкілдерімен кездесті, деп хабарлайды Маңғыстау облысы әкімінің баспасөз қызметі.

Кездесуде өңірдің әлеуметтік-экономикалық дамуы, өнеркәсіп, туризм, тұрғындарды ауыз сумен қамтамасыз ету, сондай-ақ ауыл және балық шаруашылығы мәселелері талқыланды.

Өңір басшысы екіжақты ынтымақтастықты нығайтуға бағытталған барлық бастамаларды, сондай-ақ кез келген ұсыныстар мен бизнес-идеяларды қолдайтынын атап өтті.

- Сіздерді киелі Маңғыстау жерінде қарсы алғанымызға қуаныштымыз. Біздің бүгінгі кездесуіміз жобаны табысты іске асыру үшін нақты бірлескен іс-қимылдардың бастауы болады деп үміттенеміз. Маңғыстау еліміздің әлеуметтік-экономикалық дамуына қомақты үлес қосып отырған Қазақстанның жетекші және маңызды өңірлерінің бірі болып табылады. Маңғыстау 5 елмен: батысында – Ресей Федерациясымен, Әзербайжанмен және Иранмен, оңтүстігінде – Түрікменстанмен және шығысында – Өзбекстанмен шектеседі. Өңірде экономиканы дамытудың басым бағыттары: мұнай-газ өндіру, мұнай сервисі, өңдеу өнеркәсібі, көлік және логистика, агроөнеркәсіптік кешен, туризм және жаңартылатын энергетика болып айқындалды. Біз өз тарапымыздан екіжақты ынтымақтастықты нығайтуға бағытталған барлық бастамаларды қолдауға әрқашан дайын екенімізді атап өткім келеді,- деп атап өтті Нұрлан Ноғаев.

Кездесу соңында вице-президент Алан Пию ЕҚДБ Маңғыстау облысының әлеуметтік-экономикалық дамуына бағытталған жобаларды табысты іске асыруға дайын екенін жеткізді.

• 13.09.2022
• 358