Маңғыстауда белгілі кино және театр әртісі Меруерт Өтекешованың шығармашылық кеші өтті

20 қыркүйек күні "Abish Alemi" II Халықаралық театр фестивалі аясында Н.Жантөрин атындағы Маңғыстау облыстық музыкалық-драма театрында танымал кино және театр әртісі Меруерт Өтекешовамен кездесу кеші өтті, деп хабарлайды Маңғыстау облысы әкімінің баспасөз қызметі.

Кездесу кешіне облыс әкімі Нұрлан Ноғаев, қазақ театр және кино өнерінің абызы Асанәлі Әшімов, Қазақстанның халық әртістері Тұңғышбай Жаманқұлов, Қазақстанның еңбек сіңірген қайраткері Ақұштап Бақтыгереева, мәдениет қайраткерлері және т.б қонақтар қатысты.

Кездесуде алдымен "Қазақтың Төлегені" Құман Тастанбеков және «Қазақтың Қыз Жібегі» Меруерт Өтекешованың шығармашылығына арналған деректі фильм көрсетілді.

-Біз бүгін "Әбіш әлемі" халықаралық фестивалі аясында қуанышты еселей түскен әдемі бір кездесуге жиналып, Қазақтың "Қыз Жібегі" атанған Меруерт Өтекешова апамызбен дидарласып, көзайым қуанышқа бөленіп жатырмыз. Қымбатты Меруерт Қаратайқызы, Әбіш аға тойына, қалың көрермендеріңіздің ортасына қош келдіңіз! Сіз сомдаған Қыз Жібек бейнесі міне, жарты ғасырдан бері халқымыздың көз қуанышына айналып, ұлттық киноөнерінің алтын қорынан лайықты орын алып, халқымызбен бірге жасайтын сәулелі бейнеге айналды! Көрермендеріңіздің сізге деген ықыласы мен пейілі қашанда жоғары. Маңдайыңызға бұйырған асыл өнердің қашанда шыңынан көрініп, абыройыңыз асқақтай берсін! Сізге зор денсаулық, отбасыңызға амандық тілеймін!,- деп өз тілегін жеткізді Нұрлан Ноғаев.

Сонымен қатар кеште қазақ театр және кино өнерінің абызы Асанәлі Әшімов те сөз кезегін алып, өз құттықтауын жолдады. Кеш әрі қарай театр өнерпаздарының концерттік бағдарламасымен жалғасты.

• 21.09.2022
• 242