Ақтау қаласы мен Мұнайлы ауданының көлік жолдарына "Сергек" бейнебақылау жүйесін орнату жоспарлануда

Бұл туралы жол қауіпсіздігін қамтамасыз ету жөнінде өткен жиында айтылды, деп хабарлайды Маңғыстау облысы әкімінің баспасөз қызметі

Өңір басшысы Нұрлан Ноғаев, сондай-ақ мемлекеттік және құқық қорғау органдарының өкілдері "Сергек" компаниясының өкілдерімен кездесті.
Жоба авторының айтуынша, бүгінгі таңда Қазақстанның 9 қаласында "Сергек" камералары орнатылған. Бейнебақылау камералары жедел басқару орталығына (ЖБО) шығарылды.

"Сергектің" көмегімен полиция қызметкерлері заңсыз әрекеттерге жедел әрекет ете алады. Бейнебақылау камерасындағы жазба жүйеде 30 күн сақталады.

- Алдағы екі айда "Сергек" жүйесінің камералары біздің өңірге әкеліне бастайды. Инвестордың қызығушылығы бар, ол осы жобаға инвестиция салуға дайын. Мемлекеттік-жекеменшік әріптестік шеңберінде 5 жыл ішінде олар камералардың үздіксіз жұмыс істеу қабілетін қамтамасыз ететін болады. Бұл жүйені орнату - жаяу жүргіншілердің қауыпсіздігін қамтамасыз етуге, жол-көлік оқиғаларының санын азайтуға, жол қозғалысын реттеуге мүмкіндік береді. Айта кету керек, барлық айыппұл жергілікті бюджетке түседі, - деді Ақтау қаласының әкімі Нұрдәулет Қилыбай.

Өңір басшысы жобаны жүзеге асырудың маңыздылығы мен тиімділігін атап өтті.

Айта кету керек, "Сергек" жүйесі - қазақстандық өнім.

- Маңғыстау облысының әкімдігі "Маңғыстау облысында фотобейнетіркеу және бейнеталдау жүйесін құру және пайдалану" МЖӘ жобасын іске асыруда, оның шеңберінде Ақтау қаласында 108 жылдамдық өлшегіш нүктесі мен 102 бірлік бейнебақылау камерасын, сондай-ақ Мұнайлы ауданының елді мекендерінде 40 жылдамдық өлшегіш нүктесі мен 300 бірлік бейнебақылау камерасын орнату көзделген. Маңғыстауда "Сергек" жүйесін іске қосу жұмыстары осы жылдың аяғында басталады, - деді Маңғыстау облысының цифрландыру басқармасының басшысы Айдын Хадиев.

• 22.09.2022
• 236