Аймақ басшысы "Sagun group" түрік корпорациясының өкілдерімен кездесті

27 қыркүйекте облыс әкімі "Sagun group" түрік корпорациясының өкілдерімен кездесті, деп хабарлайды Маңғыстау облысы әкімінің баспасөз қызметі.

Кездесуге Маңғыстау облысының әкімі Нұрлан Ноғаев, "Sagun Group" түрік корпорациясының вице-президенті Сагун Огулджан Кемал бастаған өкілдері қатысты.

Кездесу барысында тараптар Маңғыстау облысында балық шаруашылығы саласында инвестициялық жобаны іске асыру мәселелерін талқылады.

"Sagun Group" түрік корпорациясы 1950 жылы құрылды. Корпорация ішкі және сыртқы нарықтарда тұтынуға дайын теңіз өнімдерін өсіру, өндіру, импорттау және экспорттау бойынша өз қызметін жүзеге асырады. "Sagun Group" өз өнімдерін 35 елге жеткізеді.

Бүгінгі таңда корпорацияға 8 түрлі компания, 11 аквакультура орталығы, Еуропа мен Түркиядағы алғашқы жеке теңіз өнімдері нарығы, сондай-ақ түрік және Еуропа нарықтарына балық және балық өнімдерін жеткізудің алғашқы жеке корпорациясын құрайтын 25 кеме паркі кіреді.

Өз кезегінде өңір басшысы екіжақты ынтымақтастықты нығайтуға бағытталған барлық бастамаларды, сондай-ақ өңір үшін маңызды кез келген ұсыныстар мен жобаларды қолдайтынын атап өтті.

- Қасиетті Маңғыстау жеріне қош келдіңіздер! Маңғыстау облысында балық шаруашылығын дамытуға қызығушылық танытқандарыңыз үшін алғыс айтқым келеді. Қолда бар әлеуетті ескере отырып, сондай-ақ балық шаруашылығы саласындағы түрік тарапының тәжірибесін назарға ала отырып, біз әрқашан осы бағытта инвестициялар тартуға және тәжірибе алмасуға дайынбыз. Қазақстанда балық шаруашылығын дамыту үшін су ресурстары жеткілікті екенін атап өткім келеді. Атап айтқанда, Маңғыстау облысында Каспий теңізінің бір бөлігінде немесе теңіз жағалауында тоған шаруашылығын ұйымдастыру арқылы албырт және бекіре тұқымдас балық түрлерін өсіру үшін мүмкіндігіміз бар. Бүгінгі таңда балық шаруашылығы саласында балық өсіру басым бағыттардың бірі. Мемлекет Басшысы Қасым-Жомарт Тоқаев өз Жолдауында Үкіметке балық өсіру және қайта өңдеу кәсіпорындарын ашу және жер учаскелерін, инженерлік инфрақұрылымды ұсына отырып, өнімді жергілікті және халықаралық нарықтарда ілгерілету үшін қолайлы жағдай жасауды тапсырды. Осыған байланысты Үкімет балық шаруашылығын дамытудың 2030 жылға дейінгі бағдарламасын қабылдады. 2021 жылдан бастап біз оны іс жүзінде іске асыруға кірістік. Маңғыстау облысы бойынша 2030 жылға қарай балық өсіру көлемін жылына 30-дан 100 мың тоннаға дейін жеткізу жоспарлануда. Бұндай көлемде балық өсіру үшін балықты жоғары сапалы жеммен қамтамасыз ету маңызды. Біздің кездесуіміз және талқылауымыз осы бағыттағы өзара тиімді ынтымақтастық бойынша сындарлы ұсыныстар әзірлеуге мүмкіндік беретініне сенімдімін. Маңғыстау облысы үшін, балық ресурстары мен басқа да су жануарларын аулау, өсіру, өңдеу бойынша қажетті құзіреттері, білімі, озық технологияларға ие «SAGUN GROUP» компаниясымен байланысын нығайту өте маңызды,- деді Нұрлан Ноғаев.

Маңғыстау облысында бүгінде балық өсіру бойынша іске асырылып жатқан және жоспарланып отырған инвестициялық жобалар бар. Атап айтқанда, «Казах Осетр» ЖШС, «Каспиан Ривьера», «Industrial Fish Plant».

Сондай-ақ, биыл Маңғыстау облысы әкімдігінің жанынан балық шаруашылығын дамыту мәселелерімен тікелей айналысатын балық шаруашылығы басқармасы құрылды.

• 28.09.2022
• 192