Е.Тоғжанов: Біз сындарлы диалогқа ашықпыз

Ақтөбе облысының әкімі Ералы Тоғжанов журналистермен кездесті.
Аймақ басшысы БАҚ өкілдерімен өңірдің әлеуметтік-экономикалық дамуына қатысты өзекті мәселелерді талқылады. Оның ішінде жолдарды дамытуға, ұзақ мерзімді құрылысқа, өзен арналарын кеңейтуге және тереңдетуге қатысты маңызды мәселелерді шешу, сондай-ақ қазір қолға алынған «Ауыл аманаты» пилоттық жобасын жүзеге асыру бар.

«Халықты толғандыратын мәселелерді сіз бен біз бірлесіп шешуіміз керек. Жүйелі көзқарасты талап ететін бірқатар мәселелер бар. Біз оларды зерттейміз. Біз сындарлы диалогқа ашықпыз, ақтөбеліктер әлеуметтік желілер мен БАҚ арқылы көтерген бірде-бір тақырып назардан тыс қалмайды. Қазір аудандарды аралап, жағдайды зерттеп жатырмын. Біз көптеген мәселелерді жылдам шешуге тырысамыз. Біздің басты міндетіміз – халықтың тұрмыс сапасын көтеріп, әл-ауқатын арттыру», – деді жұмыс нәтижесін тілге тиек еткен Ералы Тоғжанов.
Атап айтқанда, бір айға жетпейтін уақыт ішінде облыста жолға қатысты бірқатар өзекті мәселелер шешімін тапты. Облыс басшылығының қазақстандық битум өндірушілермен қол жеткізген келісімінің арқасында жол жобаларын жүзеге асыру мерзімін қысқартуға мүмкіндік туды. Қысқа мерзімде Заречный тұрғын алабындағы Елек өзені арқылы өтетін көпірге ағымдағы жөндеу жұмыстары жүргізіліп, Есет батыр мемориалдық кешеніне жол салынды. Барлық жұмыстар мердігерлер арқылы атқарылды. Өңір үшін  көптен күткен оқиға – 15 қазанда мердігерлер Ақтөбе-Қандыағаш жолының бір жағын ашады.
Сондай-ақ, журналистерді Мұғалжар, Ырғыз аудандарындағы апатты және үш ауысымды мектептердің мәселелерін шешу, елді мекендерді сумен қамтамасыз ету, т.б. сұрақтар қызықтырды.

• 30.09.2022
• 320