Маңғыстауда Хатимолла Бердіғалиевке арналған шығармашылық кеш өтті

29 қыркүйекте Қазақстанның еңбек сіңірген қайраткері, "Парасат" орденінің иегері Хатимолла Бердіғалиевтің 70 жылдығына орай "Шырқал ән, төгіл дауыс" атты шығармашылық кеш өтті, деп хабарлайды Маңғыстау облысы әкімінің баспасөз қызметі.

Дәстүрлі әнші, әрі ақын 70 жасқа толды. Өзінің мерейтойына орай ол Құрманғазы атындағы Батыс Қазақстан облыстық филармониясының ұжымымен бірге республика бойынша гастрольдік сапар жасап, Маңғыстау өңіріне де келді.

Концертте Батыстың дәстүрлі ән өнерінің негізін қалаушылардың бірі, әнші, термеші Хатимолла Бердіғалиевтің орындауындағы дәстүрлі әндер шырқалды.

Айта кетейік, Катимолла Бердіғалиевтің репертуарында үш жүзден астам қазақтың халық әндері, оның ішінде Бұқар, Базар, Қашаған жыраулардың, Мұхит Мералыұлы, Ғарифолла Құрманғалиевтің және көптеген халық композиторларының шығармалары бар.

Өз кезегінде аймақ басшысы
айтыскерге еліміздегі өнер мен мәдениеттің дамуына қосқан үлесі үшін алғысын білдірді.

Хатимолла Жәңгірұлы 1975 жылы БҚО, Казталов ауданында еңбек жолын ұстаздық қызметтен бастап, балалар бақшасының музыка жетекшісі, аудандық мәдениет үйінің әдіскері, аудандық мәдениет бөлімінің меңгерушісі қызметтерін атқарып, Кейін, 1991 жылы Орал қаласындағы Құрманғазы атындағы саз колледжіне ұстаздық қызметке шақыртылып, дәстүрлі ән өнері бойынша шәкірттер тәрбиеледі. Ол іскерлік қабілетімен, үздік өнерімен танылып, бірнеше дүркін бүкілодақтық, республикалық, халықаралық байқаулардың лауреаты атанды. Ресей Федерациясы, Монғолия, Қырғызстан, Өзбекстан елдерінде қазақтың ұлттық дәстүрлі ән шығармаларын орындауда ерекше өнерімен танылды. 2007 жылдан бастап Ғарифолла Құрманғалиев атындағы облыстық филармониясының әншісі болып қызмет атқарып келеді.

• 06.10.2022
• 193