Маңғыстауда білім беру саласының қызметкерлерін кәсіби мерекелерімен құттықтады

30 қыркүйекте облыс әкімі Нұрлан Ноғаевтың қатысуымен Мұғалімдер күніне арналған мерекелік іс-шара өтті, деп хабарлайды Маңғыстау облысы әкімінің баспасөз қызметі.

Өңір басшысы барша ұстаздар қауымын кәсіби мерекелерімен құттықтады.

-Сіздерді кәсіби мерекелеріңіз - Ұстаздар күнімен шын жүректен құттықтаймын! Әлемдегі ең асыл мамандық иесі – Мұғалім! Біліктілігі жоғары, беделі мықты, қоғамда құрметке бөленген мұғалімдерсіз мемлекеттің жарқын болашағын елестету қиын. Себебі экономиканың, мәдениет пен тұтастай қоғамның дамуы сіздердің еңбектеріңіздің нәтижесіне тікелей байланысты. Еліміздің бетке ұстар азаматтарын тәрбиелеп, жауапкершілігі мол және абыройлы міндетті атқарып жүрсіздер. Мемлекет басшысы Қасым-Жомарт Тоқаев үнемі педагогтер мен оқушыларды қолдауға ерекше көңіл бөліп келеді. Тәуелсіз елімізде айтарлықтай өзгерістер болды. Білім беру жүйесі де өзгерді. Білімімізді шыңдап, жаңа дағдыларды игердік. Бұл жетістіктерге қол жеткізуде біздің әріптестеріміз – мұғалімдердің еңбегі мен кәсібилігінің үлесі өте зор. Сондықтан да, уақытпен санаспай, бар ынта-жігерімен балалардың бойына ізгілік нәрін егетін, қабілеттерін ұштап, білгендерін үйрететін жандарға бас иеміз. Сіздердің қиын да қызықты қызметтеріңізге табыс, зор денсаулық, қажымас қайрат тілеймін! Осы оқу жылында егемен еліміздің мерейін арттыратын жетістіктер мен мол табыстарға жете беріңіздер!,-деді Нұрлан Ноғаев.

Салтанатты шарада білім саласында елеулі еңбек еткен бірқатар ұстаздар Қазақстан Республикасының оқу-ағарту министрлігінің және облыс әкімінің құрмет грамотасымен, алғыс хатымен, «Еңбек ардагері», «Білім беру ісінің құрметті қызметкері», «Ы. Алтынсарин» төсбелгілерімен, «Орта білім беру ісінің үздігі», «Техникалық және кәсіптік білім беру ісінің үздігі» құрмет дипломдарымен марапатталды.

Сонымен қатар Маңғыстау облысы әкімінің қаулысымен жетістіктері жоғары мұғалімдерге «Маңғыстау облысының білім беру саласына қосқан үлесі үшін» төсбелгісі және 500 000 теңге көлемінде бір жолғы сыйақы табысталды.

Өңірде бүгінгі таңда 23 мыңға жуық педагог ұрпақ тәрбиесімен айналысады. Олардың 60%-ы жаңа форматтағы біліктілік санаттары бар педагогтар. Ұстаздар қатары биыл тағы да 400- ден астам жас маманмен толықты. Ал мектептер қатарына жаңа заманауи үлгідегі 600 және 1200 орындық екі мектеп қосылды.

• 06.10.2022
• 211