«AMANAT» партиясы Маңғыстау облыстық филиалының кезектен тыс XXХV конференциясы өтті

30 қыркүйек күні «AMANAT» партиясы Маңғыстау облыстық филиалының
кезектен тыс XXХV конференциясы өтті, деп хабарлайды Маңғыстау облысы әкімінің баспасөз қызметі.

Жиынға «AMANAT» партиясы Маңғыстау облыстық филиалының төрағасы, облыс әкімі Нұрлан Ноғаев, «AMANAT» партиясы Манғыстау облыстық филиалының атқарушы хатшысы Нұрбек Қарасаев, қала, аудан конференцияларынан ұсынылған 104 делегаттың 100 делегаты қатысты.

Күн тәртібінде «AMANAT» партиясы саяси тұғырнамасының жобасы талқыланып, партияның кезектен тыс XXIV съезіне делегаттар сайлау және «AMANAT» партиясы Маңғыстау облыстық филиалының саяси кеңесінің құрамына өзгерістер мен толықтырулар енгізу туралы мәселелер қаралды.

Партияның саяси тұғырнамасы туралы «AMANAT» партиясы Манғыстау облыстық филиалының атқарушы хатшысы Нұрбек Қарасаев баяндады.

-Әрбір адам лайықты білім мен медициналық көмек алуға, жеке қауіпсіздігінің қорғалуына, ыңғайлы әлеуметтік орта мен жайлы үйде тұруға құқылы. Біз тың идеяларға ашық, сыни және креативті ойлай алатын, ізденімпаз, өмірін білім мен кәсіби қабілетін жетілдіруге арнауға дайын азаматтарды тәрбиелеп шығаруымыз қажет. Бұл – зияткер, озық ойлы ұлтты қалыптастырудың негізгі алғышарты. Денсаулық, медицина саласында кезек күттірмейтін мәселелер аз емес.
Азаматтардың жоғары стандартты, сапалы медициналық ем қабылдауына мүмкіндік жасау керек. Біз қоғамымыздағы жалақы аздығы мәселесін шешуіміз керек.
Біз жұмыссыздықтың нақты статистикасын жүргізіп, онымен күресетін боламыз. Барлық тәжірибеміз бен қабілетімізді Қазақстан Республикасының Президенті Қасым-Жомарт Кемелұлы Тоқаев бастамашы болған түбегейлі реформаларды табысты іске асыруға бағыттаймыз. Ертеңгі болашаққа нық сеніммен қадам басамыз,- деді Нұрбек Қарасаев.

Екінші мәселе бойынша аймақ басшысы сайланған депутаттарға сәттілік тіледі.

-Өздеріңізге белгілі қыркүйек айының басында Мемлекет басшысы Қасым-Жомарт Кемелұлы Тоқаев өкілеттілік мерзімін қысқарту және кезектен тыс Президент сайлауын өткізу арқылы елдің саяси жүйесін түбегейлі өзгертуге ниетті екендігін жариялады. Ал 21 қыркүйек күні биылғы 20 қарашада кезектен тыс Президент сайлауын өткізу туралы Жарлыққа қол қойды. «AMANAT» партиясы өзінің кезектен тыс Съезін өткізуге шешім қабылдады. Қазіргі таңда барлық бастауыш партия ұйымдарында тиісті жиындар мен барлық аумақтық филиалдарда кезектен тыс конференциялар өткізіліп, облыстық кезектен тыс конференциясына 104 делегат сайланды. Бұл сіздерге көрсетілген үлкен сенім. Сол сенімді ақтайды деп үміттенеміз,-деді Нұрлан Ноғаев.

• 06.10.2022
• 235