Маңғыстауда Нұртілеу Иманғалиұлының 70 жылдығына орай жылжымалы көрме ашылды

4 қазанда Әбіш Кекілбаев атындағы облыстық тарихи-өлкетану мұражайында ҚР еңбек сіңірген мәдениет қайраткері Нұртілеу Иманғалиұлының 70 жылдығына арналған "Бай, қуатты болайық!" жылжымалы көрмесінің
ашылу салтанаты өтті, деп хабарлайды Маңғыстау облысы әкімінің баспасөз қызметі.

Салтанатты шараға Маңғыстау облысының әкімі Нұрлан Ноғаев, Нұртілеу Иманғалиұлының жары Қарлығаш Советбекқызы, белгілі өлкетанушы Отыншы Көшбайұлы, сондай-ақ өңірдің зиялы қауым өкілдері қатысты.

Өз кезегінде өңір басшысы Нұртілеу Иманғалиұлының телевизия саласында өшпес із қалдырып, халқымыздың рухани-мәдени байлығын дамытуға зор үлес қосқанын атап өтті.

-Құрметті жиынға қатысушылар, құрметті Қарлығаш Советбекқызы!
Бар ғұмырын телевизияға арнаған Нұртілеу Иманғалиұлының 70 жылдығына арналған «Бай қуатты болайық!» жылжымалы көрмесінің ашылуымен баршаңызды құттықтаймын.
Бұл көрме Маңғыстауға дейін еліміздің басқа өңірлерінде қойылып, халық назарына ұсынылып біздің төрімізде жалғасуда. Нұртілеу Иманғалиұлы - саналы ғұмырын журналистика саласына арнай жүріп, өзінен кейінгі буынды тәрбиелеуге зор үлес қосқан азамат. Оның әлеуметтік мәселелерге арналған авторлық бағдарламалары халықтың жадында мәңгі қалды. Ол өзінің жарқын бейнесімен сауатты сұхбаттар жүргізіп, талантты және танымал тұлғалығын сақтап, қалың көрерменді өзінің ерекше бағдарламалары арқылы көгілдір экран алдына жинап, еліміздің тележурналисикасының дамуына елеулі үлес қосты. Бүгінгі басқосуда арамызда ағамыздың жары Қарлығаш Советбекқызы отыр. Қасиетті Маңғыстау жеріне қош келдіңіз! Әбіш Кекілбаев атындағы тарихи-өлкетану мұражайында ашылған көшпелі көрме жас ұрпақтың зияткерлік және шығармашылық әлеуетін қалыптастыруға зор үлес қосатынына сенімдімін,- деді Нұрлан Ноғаев.

Нұртілеу Иманғалиұлы өмірінің 45 жылын телевизия саласына арнаған журналист. 2003 жылдан 2006 жылға дейін Үкімет аппаратында, содан кейін Президент әкімшілігінде жауапты қызметтер атқарды. 2006-2007 жылдары - "Қазақстан" республикалық телерадиокорпорациясы" акционерлік Қоғамының басқарма төрағасы, ал 2008 жылдан бастап зейнеткерлікке шыққанға дейін басқарма төрағасының кеңесшісі болып еңбек етті.

Ол екі рет Қазақстан Республикасы Президентінің Құрмет грамотасымен марапатталды. Сонымен қатар "Парасат" ордені, "Ерен еңбегі үшін" медалі, "ҚР еңбек сіңірген қайраткері" құрметті атағы, сонымен қатар Қазақстан Республикасының Тұңғыш Президенті - Елбасының мәдениет саласындағы стипендиясын иеленді. Ол Қазақстан Журналистер Одағының үш дүркін, сондай-ақ "Майталман" номинациясы бойынша "Nur Otan" партиясының "Нұр Сұңқар" байқауының лауреаты.

Нұртілеу Иманғалиұлы еңбек жолында көгілдір экраннан 4500 хабар таратып, "Құрдастар", "Жастар дауысы", "Арай", "Жадыңда ма, жолдас", "Айна", "Жас Жігер", "Бетпе-Бет", "Қолтаңба", "Діңгек", "Көршілер", "Заң сөйлесін" және т.б. авторлық бағдарламалары арқылы қалың көрерменнің есінде қалды.

• 06.10.2022
• 253