Маңғыстауда Қазақстан Республикасының кәсіподақтар күні атап өтілді

6 қазанда өңір басшысы Нұрлан Ноғаевтың қатысуымен Қазақстан Республикасы кәсіподақтар күніне арналған салтанатты шара өтті, деп хабарлайды Маңғыстау облысы әкімінің баспасөз қызметі.

Өз кезегінде өңір басшысы сала қызметкерлерін мерекемен құттықтады.

-Құрметті жиынға қатысушылар, кәсіподақ ардагерлері! Баршаңызды Қазақстан Республикасының Кәсіподақтар күнімен құттықтаймын! Қазіргі Қазақстандық кәсіподақ қозғалысының тарихы 1990 жылдың 10 қазанда, Қазақстан кәсіподақтарының XIV съезінде бастау алды. Бұл күнді кәсіби мерекелер тізіміне енгізуге Қазақстан Республикасының Кәсіподақтар Федерациясы шешуші рөл атқарғанын атап өткен жөн.
Кәсіподақтың негізгі мақсаты жұмыскерлердің құқықтарын қорғауға, жұмыс берушімен қарым-қатынасты, олардың әлеуметтік-экономикалық жағдайын жақсартуға бағытталған.
Бүгінде өңірде 126 кәсіподақ жұмыс берушімен жұмысшылардың арасында алтын көпір қызметін атқарып келеді.
Кәсіподақтар федерациясымен көп жылдар бойы сындарлы және іскерлік қарым-қатынас орнаттық. Сіздердің алдағы қызметтеріңізге белсенді де жемісті жұмыс, еңбектеріңізге толағай табыс, амандық және өркендеу тілеймін!
Әділдік, бірлік және ынтымақтастық қағидаттарына негізделген кәсіподақ дәстүрлері нығая берсін!,-деді Нұрлан Ноғаев.

Іс-шара барысында еңбек және әлеуметтік-экономикалық құқықтарды қорғаудағы белсенді қызметі үшін, сондай-ақ әлеуметтік әріптестікті нығайтуға қосқан елеулі үлесі үшін бірқатар кәсіподақ мүшелеріне облыс әкімінің алғыс хаты, сонымен қатар Қазақстан кәсіподақтар Федерациясы атынан кәсіподақта көп жылдар еңбек етіп, кәсіподақ қозғалысының қалыптасуына, нығаюына және дамуына қосқан елеулі үлесі үшін медальдар табысталды.

Маңғыстау облысында салалық кәсіподақтардың 45 жергілікті құрылымы жұмыс істейді, жалпы қызметкерлер саны 100 мыңнан асатын 695 бастауыш кәсіподақ ұйымдары қызмет атқарады.

Қазіргі уақытта Маңғыстау облысының кәсіподақ ұйымдарында жаңа жүйе қалыптасты. Облыстық кәсіподақ орталығы жұмысшылардың мүддесін қорғайтын ұйымға айналды. Қазірдің өзінде Кәсіподақ орталығында жүйелі түрде сегіз салалық филиал жұмыс істейді.

• 08.10.2022
• 352