Инвесторлар Маңғыстауда мұнайдан ластанған топырақты тазартуды жоспарлап отыр

11 қазанда облыс әкімі Нұрлан Ноғаев «CleanFieldKazakhstan» компаниясының өкілдерімен кездесті, деп хабарлайды Маңғыстау облысы әкімінің баспасөз қызметі.

Кездесуге «CleanFieldKazakhstan» ЖШС директоры Бектас Әбдіманапов, ENNOX компаниясының директорлар кеңесінің төрағасы Тим Додсон, «CleanFieldKazakhstan» ЖШС құрылтайшысы Айтмұхаммед Алдажаров, «Ақтау Петро Консалтинг» ЖШС директоры Арман Әбдіраш Ennox технологиясын дамыту жөніндегі менеджері Марьяна Луна қатысты.

CleanField Kazakhstan – топырақты, мұнай шламдарын және бұрғылау кезіндегі қалдықтарды тазалау бойынша дат және норвегия технологияларын қолданатын серіктес-компания. CleanField Kazakhstan Қазақстанда BioBox технологиясымен пилоттық жобаны сәтті аяқтады және технологияны Қазақстан аумағында пайдалануға рұқсаты бар.

Аталған кәсіпорын Қарақия ауданы, Жетібай ауылында орналасқан, учаскенің ауданы 10 га, жобаның құны 4 млрд тенге. Жобаның әлеуеті - жылына 300 мың тонна мұнаймен ластанған топырақты тазарта алады. 84 жұмыс орны ашылған.

Кездесу барысында тараптар ластанған топырақты қалпына келтірудің кешенді шешімін талқылады.

– Сіздерді Маңғыстау жерінде қарсы алғанымызға қуаныштымыз. Өкінішке орай, Маңғыстау өңірінде экология саласында өзекті мәселелер бар. Бұл жөнінде тұрғындар да арыз-шағымдарын жиі айтады. Қазіргі уақытта біз ластанған жерлерді соңғы технологиялар арқылы тазартуға мүдделіміз. Мемлекет басшысы Қазақстан халқына Жолдауында геологиялық барлау мен мұнай-газ саласына инвестиция тарту, сондай-ақ жаңа жұмыс орындарын ашу жөнінде бірқатар нақты тапсырмалар берді. Сіздің жобаңыз өңіріміздің экологиялық мәселелерін шешуге оң әсер етеді деп сенеміз, деді Нұрлан Ноғаев.

CleanfieldKazakhstan компаниясы
мұнай қалдықтарын тазалауда нарықтағы басқа технологиялармен салыстырғанда тиімділігі жоғары және шығындары аз, қоршаған ортаға әсері де айтарлықтай төмен технологиялық шешімдер ұсынып отыр.

2015 жылы компания Өзен кен орнында мұнаймен ластанған топырақтағы мұнай құрамын төмендету бойынша сәтті тәжірибелік сынақ жүргізді. Дәл сол жылы Бозашы кен орнында норвегиялық компания топырақты тазалаудың гидродинамикалық әдісін қолданып сынақтар жүргізді.

• 12.10.2022
• 280