Араға жарты жыл салып, Саранның тұрғындарымен қайта кездестім. Сондай-ақ азаматтарды жеке мәселелері бойынша қабылдадым

Қазіргі уақытта Саран моноқалалардың экономикасын әртараптандыру бойынша алдынғы қатарда. Келесі жылы индустриялық аймақта тағы төрт өндірістің құрылысын бастаймыз. Қалада әлі де шешілмеген әлеуметтік проблемалар аз емес.

Атап айтқанда, Абай атындағы мектепте спорт залын салу мәселесі бойынша өз міндетін атқармаған мердігерге қатысты сотқа арыз берілді. Қазір құрылыс жүргізуге жаңа конкурс жарияланды.

Қазақ тілінде оқытатын мектепке дейінгі топтарды кеңейту бойынша. Білім басқармасына тексеруді бастауға және бұл мәселені шұғыл шешуге тапсырма бердім. Сонымен қатар «Жайлы мектеп» ұлттық жобасы аясында Саран қаласында екі жыл бойына жаңа мектепті саламыз. Облыстың басқа аудандарында да тағы 15 мектеп салынады.

Шалғай жатқан 106-шы шахта ауылының тұрғындары мектепке қатынауға көлік бөлуді сұраған еді. Өздеріңіз білетіндей Саран қаласында автобус шығаратын зауыт жұмыс істейді. Қазір зауыттан шалғайдағы ауылдардың балаларына арнап 25 мектеп автобусы сатып алынды. Мектептердің автопаркін толықтыруды жалғастыратын боламыз. Бұл ретте Саранның алыста жатқан ауыл балалары да назарға алынады.

Сондай-ақ тұрғындар тарапынан орталық қазандықтың құрылысы бойынша да сұрақтар болды. Құрылыс осы жылдың желтоқсанында аяқталады. Ал тұрғын үйлер мен әлеуметтік сала объектілерін жылуға қосу 2023 жылы басталады.

Барлық мәселелер менің жеке бақылауымда болады.

• 12.10.2022
• 288