Солтүстік және Орталық Азия елдері Тұрақты даму мақсаттарына қол жеткізудегі прогресті талқылады

ҚР Ұлттық экономика вице-министрі Абзал Әбдікәрімов Алматыда Тұрақты даму мақсаттарына қол жеткізу бойынша Солтүстік және Орталық Азияның алтыншы көпжақты форумына қатысты.

Ол өз сөзінде Қазақстан Тұрақты дамуға көшу бойынша кезең-кезеңімен жұмыс жүргізіп жатқанын атап көрсетті. Бүгінгі күні мемлекеттік жоспарлау жүйесін үйлестіруді және құжаттармен қамтуды қамтамасыз ететін заңнамалық база құрылды.

«Тұрақтылық пен инклюзивтілік қағидаттары ҚР 2025 жылға дейінгі жаңа Ұлттық даму жоспарының негізі болып табылады. Қазақстанда қабылданған міндеттемелерді тиімді жүзеге асыру үшін ТДМ бойынша Үйлестіру кеңесі жұмыс істейді», - деді ол.

Вице-министрдің айтуынша, ҰЭМ-ге Тұрақты даму мақсаттары бойынша жүргізіліп жатқан жұмыстарды үйлестіруші орган рөлі жүктелген. Қазіргі уақытта негізгі бағыттар бойынша ведомствоаралық жұмыс топтары құрылды.

А.Әбдікәрімов ағымдағы жылғы шілдеде Нью-Йорк қаласында Қазақстан негізгі жетістіктерді, қиындықтар мен туындайтын проблемаларды бейнелейтін екінші Ерікті Ұлттық шолуды ұсынғанын атап өтті. Халықаралық қоғамдастық өкілдері мен Форумға қатысушылар елімізде ТДМ іске асыру үдерісін жоғары бағалады.

Сонымен қатар, Қазақстан 2060 жылға қарай көміртегі бейтараптығына қол жеткізу жөнінде өршіл мақсат қойды. Осы міндетті жүзеге асыру үшін ҰЭМ тиісті Стратегияны әзірлеуде.

«Бұл құжат көміртегі бейтараптығына көшу шеңберінде ел экономикасын дәйекті түрде трансформациялау жөніндегі мемлекеттік саясаттың ұлттық тәсілдерін, көзқарастарын және стратегиялық бағытын айқындайды», - деді ол.

• 14.10.2022
• 253