Ақтөбе облысында азаматтық сектор институттарын дамытудың негізі басымдықтары талқыланды

Бүгін Ақтөбе облысының әкімі Ералы Тоғжанов үкіметтік емес ұйымдардың өкілдерімен кездесті. Жиынды ашқан облыс басшысы ел дамуындағы азаматтық қоғам рөлінің маңыздылығын тілге тиек етті. Бүгінде үкіметтік емес ұйымдардың жұмысына жағдай жасау мемлекеттік саясаттың басым бағыттарының бірі болып қала береді. Өйткені, азаматтық сектор - мемлекет пен халық арасындағы алтын көпір.

«Мемлекет басшысы Қасым-Жомарт Тоқаев биылғы Қазақстан халқына Жолдауында азаматтардың белсенділігін арттыруға, мемлекет пен қоғамның  саналы әрі сындарлы серіктестігіне жол ашудың қажеттілігіне баса назар аударды. Бұл бағытта тығыз қарым-қатынас құрып, ең өзекті мәселелерді біз бірігіп шешеміз деген сенімдемін. Әсіресе, денсаулық сақтау саласы, мүгедектер мен қарттарға көмек, жастарды тәрбиелеу бағытындағы мәселелерге назар аудару қажет», - деді облыс әкімі.   

Кездесу барысында ҮЕҰ өкілдері атқарған жұмыстарының нәтижелерімен бөлісіп, ойларын ортаға салып, алдағы жоспарларымен таныстырды. Сонымен қатар, мемлекеттік органдар мен азаматтық сектордың өзара іс-қимылының перспективалары, ҮЕҰ-ның халықпен байланысы секілді  өзекті мәселелер талқыланды.

Бүгінде облыста тіркелген 773 үкіметтік емес ұйымның  635-і - Ақтөбе қаласында, қалған 138-і - аудандарда. 100-ге жуық белсенді үкіметтік емес ұйым мемлекеттік әлеуметтік тапсырыс аясында жастар саясатын қолдау, білім беру, денсаулық сақтау және салауатты өмір салтын құру, қариялармен және мүгедектермен жұмыс, үкіметтік емес ұйымдарды жұмылдыру, гендерлік саясат, дін саласы, медиация бағыттары бойынша әлеуметтік жобаларды жүзеге асырып келеді. Үкіметтік емес ұйымдардың төрағалары - облыстық, қалалық, аудандық Қоғамдық кеңестердің, Ақтөбе облысы әкімдігі жанындағы үкіметтік емес ұйымдармен өзара іс-қимыл және ынтымақтастық жөніндегі Кеңестің және облыс әкімі жанындағы Мемлекеттік рәміздер жөніндегі комиссияның мүшелері. Мәдени құндылықтарды халық арасында насихаттау, зерделеу және таратуды басты назарда ұстайтын «Мұғалім» репетиторлық мектебі» ҮЕҰ жетекшісі Юлия Савченко ауылдық жерлерде жастар саясатын дамыту туралы ұсыныс білдірді. 

Жиын соңында аймақ басшысы ҮЕҰ өкілдері көтерген барлық мәселе бойынша тиісті шаралар қабылданатынын айтып, азаматтық сектор мен мемлекеттік органдар өкілдерінен қоғамның өзекті мәселелерін шешуде күш біріктіруді сұрады.

• 18.10.2022
• 189