Ақтөбеде биыл 100 мыңға жуық ағаш отырғызылады

Бүгін Ақтөбе облысының әкімі Ералы Тоғжанов Триатлон саябағы аумағында күзгі ағаш отырғызу бойынша жалпықалалық акцияға қатысты. Шараға мемлекеттік қызметшілер, «Эдельвейс» ЖШС, «Алтын Құм» ЖШС, «Нектар ӨК», «Инвест Комплекс» ЖШС, «Дәулет Групп» ЖШС, «Светотехника W зауыты» ЖШС, «Сәулет Құрылыс 2007» ЖШС, «Сконур» ЖШС, «Шадияр Групп» ЖШС, «BD kair» ЖШС құрылыс компанияларының жұмысшылары, экобелсенділер, еріктілер қатысты. 

Ералы Тоғжанов қаланың тазалығын сақтау мен көгалдандыру өңірде экологиялық мәдениетті қалыптастырудың маңызды бағыты  екенін алға тартты.

«Алғашқы күннен-ақ жұмыла кірісіп, экологиялық мәдениетті қалыптастыруға  атсалысқан барша облыс тұрғындарына алғысым шексіз. Мемлекет басшысының тапсырмасы бойынша өңірде экологияны жақсарту шаралары қолға алынуда. Негізгі бағыттардың бірі – қаланы көгалдандыру. Бұл мәселені шешуге барлық тұрғындар, мемлекеттік және жеке меншік мекемелердің қызметкерлері, жастар атсалысуы керек», - деп атап өтті Ералы Тоғжанов.

Облыс әкімі жас көшеттердің толыққанды өсуін бақылауға алуды, суару мәселесін шешуді, қажет болған жағдайда тамшылатып суаруды қамтамасыз етуді тапсырды.

 Бүгін Триатлон саябағының аумағында барлығы 300-ден астам мойыл, үйеңкі, шырша, шаған, сирень сияқты қылқан жапырақты ағаш көшеттері отырғызылды. Өсімдіктердің барлығы облыстың климаттық жағдайына бейімделген, өйткені жергілікті  тұқымбақтардан алынған. Экологиялық акция қаланың бүкіл аумағын, саябақтар мен скверлер, елді мекендерді, сондай-ақ Ақтөбе облысының Ана мен баланы қорғау орталығының аумағын да қамтыды.

Облыс орталығында бүгін барлығы мыңға жуық ағаш отырғызылды. Жалпы алғанда Ақтөбеде жыл аяғына дейін 100 мыңға жуық тал егу жоспарланған.

Игі іс-шара облыс әкімі Ералы Тоғжановтың Ақтөбе шаһарын абаттандыру және көгалдандыру жөніндегі тапсырмасын орындау аясында өтуде.

• 18.10.2022
• 262