ҰЭМ басшысы Дүниежүзілік банк өкілдерімен екіжақты ынтымақтастық мәселелерін талқылады

Вашингтонға жұмыс сапары барысында Ұлттық экономика министрі- Дүниежүзілік банктің Қазақстан атынан басқарушысы Әлібек Қуантыров ДБ-ның Еуропа және Орта Азия аймағы бойынша Вице-президенті Анна Бьердемен кездесті.

Министр елдің әлеуметтік-экономикалық даму перспективалары, тұрақты және инклюзивті экономикалық өсуді қамтамасыз етуге бағытталған реформалар туралы айтты.

Соның ішінде бюджет-салық саласындағы жаңашылдықтар, экономиканы декарбонизациялау және инвестициялық ахуалды жақсарту.

Өз кезегінде А.Бьерде ханым қабылданып жатқан шараларға жоғары баға беріп, олардың уақтылығы мен маңыздылығын атап өтті. Кездесуге қатысушылар әлемдік экономикадағы ағымдағы ахуалды да талқылады.

Келіссөздер соңында тараптар бірлескен жобалардың іске асырылу барысын талқылап, маңызды мәселелер бойынша белсенді өзара іс-қимылды қолдауға келісті.

Бүгінгі таңда Қазақстан экономикасының басым секторларында жобаларды іске асыру бойынша реформалар матрицасы әзірленіп жатыр. Қазіргі жағдайда бұл жоба ел үшін өте маңызды.

Сондай-ақ, Ә.Қуантыров Көпжақты инвестициялық кепілдік агенттігінің (MIGA) Операциялық мәселелер жөніндегі Вице-президенті Джунаид Камал Ахмадпен кездесті.

Ұйым өкілдері Қазақстанда жүзеге асырылып жатқан жобалар туралы айтып, екіжақты ынтымақтастықты одан әрі нығайтуға дайындығын білдірді.

«Қазақстан халықаралық серіктестер үшін әрқашан ашық, бұл ретте ағымдағы жаһандық сын-қатерлерді, соның ішінде логистикалық тізбектердің үзілістерін ескеру қажет», - деді ҰЭМ басшысы.

Министр еліміз үшін климаттық күн тәртібінің маңыздылығына назар аударып, инвестицияларға мұқтаж бағыттарды атады. Олардың қатарында инфрақұрылымды дамыту мен «жасыл» экономика.

Әңгіме барысында «Қазақстан темір жолы» АҚ-ның қарызын сақтандыру арқылы қолдау мәселесі де талқыланды. Қазіргі таңда бұл сұрақты Дүниежүзілік банк мамандары зерттеп жатыр. Өз тарапынан, MIGA ағымдағы міндеттемелерді қайта қаржыландыруға әлеуетті қолдауды және ҚТЖ-ның жаңа «жасыл» инвестицияларды қарастыруда. Несиенің сапасын арттыруға бағытталған шаралар ұлттық компанияға бәсекеге қабілетті бағамен және мемлекеттік кепілдіктерсіз қаржыландыруды тартуға мүмкіндік береді.

Сонымен қатар, Ә.Қуантыров Адами капиталды дамыту жобасы бойынша жоғары деңгейдегі кеңеске қатысты.

Іс-шара Дүниежүзілік банктің президенті Дэвид Малпасстың және ДБ адами ресурстарын дамыту жөніндегі Вице-президенті Мамта Муртхи төрағалығымен өтті.

Экономикалық ведомстволардың басшылары адам әлеуетін дамыту бағыты бойынша пікір алмасты. Сондай-ақ, шара барысында атаулы әлеуметтік көмек көрсету, халықтың осал санатын жұмыспен қамтамасыз ету, ШОБ-ты дамыту үшін жағдай жасау жөнінде жүйелі шараларды қабылдау қажеттілігі атап өтілді.

Өз кезегінде, М.Муртхи ханым Қазақстан әлеуметтік әділеттілікті нығайтуға және экономикалық өсуді қамтамасыз етуге бағытталған жаһандық бастамаларға ерекше назар аудара отырып, ДБ-ның адами капиталды дамыту жөніндегі жобасына елеулі үлес қосқанын атап өтті.

• 20.10.2022
• 198