Осакаров ауданының тұрғындарымен проблемалық мәселелерді талқыладық

Осыған дейін маусым айында өткен кездесу барысында азаматтар көтерген бірқатар мәселелер бүгінде өз шешімін тапты.

Мәселен, тұрғындар жарықтың жиі сөнуіне шағымданған еді. Бұл мәселені шешу үшін «Қарағанды өңірлік электр компаниясы» ЖШС жаңғыртуға 500 млн теңге қаражатты инвестициялайды. Қазіргі уақытта жабдықтарды жөндеу жұмыстары басталып кетті.

Молодежный кентінің жылу беру қазандықтарының бірінде бес қазандық пен құбырлар, су жіберу құрылғылары ауыстырылды. Сондай-ақ Осакаровкада қосымша қазандықтар орнатылды. Сонымен қатар Абай атындағы мектепті күрделі жөндеу барысында жылыту жүйесі қалыпқа келтірілді.

Бүгінде Молодежный кентінің әлеуметтік инфрақұрылымы да жақсаруда. Екі жыл ішінде «Ауыл – Ел бесігі» бағдарламасы бойынша кенттің барлық көшелеріне асфальт төселді. Биылғы жылы екі мектеп пен мәдениет үйінде күрделі жөндеу жұмыстары жүргізілді. Сондай-ақ Батпақ, Садовое, Озёрное ауылдарындағы клубтарды жөндеу жоспарланған.

Кездесу барысында Абай атындағы тірек мектебінде оқушылар спорт алаңын орнатуды сұрады. Осы орайда мектеп жанындағы учаскені толық абаттандыруға тиісті қаражат бөлуді тапсырдым. Ал әзірге жастарымыз жөндеуден өткен спорт кешенінде жаттыға алады.

Бүгінгі таңда Молодежный кентіндегі ескірген аурухананы жөндеу мәселесі ерекше назар аударуды қажет етеді. Қазіргі уақытта аурухананы күрделі жөндеуге ЖСҚ әзірленді. Келесі жылы жөндеу жұмыстары басталып, қажетті жабдықтар сатып алынатын болады.

Сонымен қатар ауданда автожолдарды жөндеу жұмыстары жалғасуда. Биылғы жылы ұзындығы 16 км болатын Осакаровка-Молодежный учаскесінде қайта құру жұмыстары жүргізілді. 83 шақырымды құрайтын жолды жөндеу жұмыстары 2023 жылы толығымен аяқталады.

Кездесу соңында аудан тұрғындарын жеке мәселелері бойынша қабылдадым.

• 21.10.2022
• 359