Қарағандыда аутизмі бар балаларға қолдау көрсететін жаңа орталық жұмысын бастайды

Қарағандыда көптен күткен Аутизммен ауыратын балаларды қолдау орталығы таныстырылды. Орталықты ашу қажеттілігі жайлы ата-аналар қауымы біздің тұрақты түрде өтетін кездесулер барысында бірнеше рет айтқан еді.

Ендігі жерде жыл сайын бұл орталыққа 18 жасқа дейінгі 700-ге жуық бала тегін бара алады. Орталықта біздің облыстың кішкентай тұрғындарын әлеуметтендіру ғана емес, сонымен қатар олардың ата-аналарын да оқыту жүзеге асырылады.

Орталық Қарағанды қаласында Қасым Аманжолов көшесі, 92 мекенжайы бойынша орналасқан. Мұнда Монтессори, сенсорлық интеграция және өмірлік дағдылар бойынша барлығы 20 практикалық кабинет бар. Орталық мамандары аутизм диагностикасы, мінез-құлықты қолданбалы талдау, сенсорлық интеграция бойынша Қазақстанның жетекші сарапшыларынан тәлім алды. Әрбір бала үшін мұнда жеке педагог және жеке оқыту бағдарламасы қарастырылған. Алғашқы балаларды орталық қараша айында қабылдайды.

Аталған орталықты құруға қолдау білдіріп, педагогтерімізді аутизмді түзетудің озық әдістемелеріне оқытқаны үшін «Асыл Мирас» қорына зор алғысымды білдіремін.

• 22.10.2022
• 238