Республика күні қарсаңында облысымызда 130 отбасы жаңа пәтерлердің кілттерін алды

Бұқар жырау ауданының Доскей кентінде Қарағанды облысының мәдениет және өнер ұйымдарында тұрғын үй кезегі тізімінде тұрған 40 адам пәтер алды. Олардың қатарында мәдениет саласында бұрыннан қызмет етіп келе жатқан мәдениет қайраткерлері және жас мамандар бар. Сондай-ақ алдағы уақытта жақын маңда орналасқан 100 пәтерлік екі тұрғын үй пайдалануға беріледі.

Бұған дейін алғаш рет мәдениет қызметкерлері 2021 жылы Саран мен Ақтаста 30 пәтер алған болатын. Сонымен қатар өңірімізде дәрігерлер мен мұғалімдер де баспанамен қамтамасыз етілуде. Ал кеншілер, металлургтер және жұмыс істейтін жастар тұрғын үй мәселесін жеңілдетілген ипотека арқылы шеше алады.

Бұған қоса, басқа да мемлекеттік бағдарламалар жұмыс жасауда. Бүгін Республика күніне орай Теміртауда «Нұрлы жер» бағдарламасы бойынша кезекте тұрған 90 азамат пәтер кілттерін алды.

Жыл соңына дейін Қарағанды облысында түрлі бағдарламалар есебінен 5 мыңға жуық пәтер салынып, оның ішінде кезекте тұрған 2 мыңға жуық отбасын тұрғын үймен қамтамасыз етеміз.

• 22.10.2022
• 240