Шығыс Қазақстан облысы Қазақстан халқы Ассамблесының XXVIII сессиясы Этносаралық қатынастарды дамыту комитеті төрағасының қатысуымен өтті

2022 жылғы 22 қазанда облыс әкімінің, ШҚО Қазақстан халқы Ассамблеясы басшысының төрағалығымен Шығыс Қазақстан облысы жергілікті Достық үйінің 30 жылдығына арналған және Республика күніне орайластырылған Қазақстан халқы Ассамблеясының XXVIII сессиясы өтті.

Сессия жұмысына ҚР Ақпарат және қоғамдық даму министрлігі Этносаралық қатынастарды дамыту комитетінің төрағасы Ғалым Шойкин қатысты.

Өңір басшысы Д. Ахметов ШҚО-дағы этносаралық қатынастар саласындағы мемлекеттік саясатты іске асырудың негізгі үрдістері туралы хабардар етті.

Өз кезегінде Ғ. Шойкин Мемлекет басшысының Қазақстан халқы Ассамблеясының алдына қойған саяси реформаларды іске асырудағы ҚХА рөлін күшейту, ақпараттық жұмыс пен ҚХА-ның қоғамдық әлеуетін жандандыру, сондай-ақ құқық қорғау қызметін күшейту жөніндегі міндеттері туралы егжей-тегжейлі айтып берді.

Президент қойған міндеттер, ең алдымен, Ассамблеяның қоғамдық құрылымдарын құқық қорғау жұмысына тарту, жанжалдардың алдын алу, отбасылық-тұрмыстық қатынастар саласындағы құқық бұзушылықтарға қарсы іс-қимыл, сондай-ақ әйелдер мен балаларға қарсы қылмыстардың алдын алу арқылы іске асырылатын болады.

Осылайша, Ғ. Шойкин Мемлекет басшысы алға қойған міндеттерді жүзеге асыруда Ассамблея жанындағы аналар кеңесі мен қоғамдық келісім кеңестерінің алатын орны ерекше екенін атап өтті.

Сессия барысында ҚХА қызметін ғылыми-сараптамалық қолдау, руханият пен қазақстандық патриотизмді дамыту жөніндегі этномәдени бірлестіктердің қызметі, саяси қуғын-сүргін құрбандарын оңалту жөніндегі «Ассамблея жастары» қоғамдық бірлестігінің жұмысы туралы мәселелер талқыланды.

         Сессия ҚХА ардагерлерін медальдармен, ҚХА белсенділерін әкімнің алғыс хаттарымен марапаттау рәсімімен аяқталды.

• 22.10.2022
• 269