Экологиялық кодекс кәсіпорындарға ең үздік қолжетімді технологияларға көшу мәселесінде таңдау мүмкіндігін жасайды

Экологиялық кодекс кәсіпорындарға ең үздік қолжетімді технологияларға көшу мәселесінде таңдау мүмкіндігін жасайды – Зулфухар Жолдасов.

ҚР Парламенті Мәжілісінде екінші оқылымда мақұлданған Қазақстанның жаңа Экологиялық кодексі жобасының нормаларының бірі – кәсіпорындарда ең озық қолжетімді технологияларды енгізу.

Бұл тетік қазірдің өзінде әлемнің озық елдерінде қолданылуда. Еуропа елдері, мысалы, осы технологияларды пайдалана отырып, шығарындылар көлемін 90%-ға қысқарта алды. Экологиялық кодекс ең үздік қолжетімді технологияларға көшу мәселесінде бірінші санатқа жататын кәсіпорындарға таңдау мүмкіндігін жасайды. Оларға ынталандырушы факторлар беріледі. Іске асыру мерзімі – 10 жыл. Жаңа қолжетімді технологияларға ауыспаған кәсіпорындар үшін эмиссия ақысы әр үш жыл сайын өседі.

"Казцинк" және ERG сияқты ірі кәсіпорындар жаңа қолжетімді технологияларға көшуге дайын. Сонымен қатар, Экологиялық кодекс стихиялық қоқыстарды шығару мәселелерін шешуге ықпал етеді.

Қазіргі таңда, жүк көлігі бар әрбір адам хабарландыру беру арқылы азаматтардың үйлерінен қоқыс шығару қызметін көрсете алады. Содан кейін, қоқыс жинайтын арнайы алаңдарға ақша жұмсағысы келмей, барлығын қала сыртына шығарады. Осылайша, рұқсат етілмеген стихиялық полигондар пайда болады. Енді жаңа нормалар бойынша, қоқысты шығарумен тек арнайы тізімге кіретін компаниялар ғана айналысатын болады. Олар лицензия алып, көлікте GPS трекерін орнатуы қажет.Осылайша, біз олардың қоқысты қайда тастағандығын көре алатын боламыз.

Сонымен қатар, инвесторлар қалдықтардан электр энергиясын алуға бағытталған Waste to Energy механизмін қолдана отырып зауыттар салуға дайын.

Бүгінде, елімізде қалдықтардың тек 14% -ы ғана қайта өңделеді. Сондықтан, біз Waste to Energy механизмін қолдана отырып, қалдықтарды жағып, электр энергиясын алуды жоспарлап отырмыз. Шетелдік инвесторлар пилоттық жобалар ретінде Қарағанды, Ақтөбе, Нұр-сұлтан, Тараз  және Шымкент қалаларында зауыттар салуға дайын. Стандарттар күшейтілетіндігін атап өткім келеді, өйткені қалдықтарды жағу экологияға теріс әсер етпеуі тиіс.

• 23.11.2020
• 430