Маңғыстауда Республика күніне орай «Мәңгілік жаса, қыран елім - Қазақстаным!» атты салтанатты шара өтті

Маңғыстауда облыс әкімі Нұрлан Ноғаевтың қатысуымен Республика күні салтанатты түрде атап өтілді, деп хабарлайды Маңғыстау облысы әкімінің баспасөз қызметі.

Аймақ тұрғындарын осы атаулы мерекемен құттықтаған облыс басшысы бұл күннің ел тарихындағы маңыздылығына тоқталды.

- Баршаңызды айтулы мереке – Республика күнімен шын жүректен құттықтаймын. Мемлекет басшысы Қасым-Жомарт Тоқаевтың бастамасымен бұл күн ұлттық мерекелер тізбесіне еніп, тарих беттеріне алтын әріптермен жазылады. 1990 жылы 25 қазанда Қазақстанның егемендігі туралы декларация қабылданып, елдің егемендігі, тәуелсіз мемлекет ретіндегі саяси-құқықтық негіздері жарияланды. Сондықтан да, бұл күн аса мәнге ие. Ел Президенті өз жолдауында қоғам болып оң саясатты жүргізе отырып, бірлік пен ынтымақтастықты ту етіп, әлемдегі үздік жетістіктерді алуымыз қажеттігін айтты. Бүгінде Президенттің берген тапсырмасына сәйкес, аймақта барлық салада оң нәтижелер іске асуда. Бұл - барлығыңыздың еңбектеріңіздің ортақ жемісі. Осы орайда, еліміздің әл-ауқаты күн сайын артып, әр шаңырақта бейбітшілік пен бақыт салтанат құрсын дегім келеді. Мереке күні баршаңыздың отбасыларыңызға амандық-саулық, құт-береке тілеймін. Тәуелсіз Қазақстанның өркендеу жолында жасап жатқан игілікті жұмыстарыңызға табыс тілеймін, - деді аймақ басшысы Нұрлан Ноғаев.

Сондай-ақ, өңір басшысы мемлекеттік және қоғамдық, әлеуметтік жұмыстарға белсене араласып, еңбегі еленген маңғыстаулық бірнеше азаматты ІІ дәрежелі “Айбын”, “Шапағат”, “Құрмет”, “Парасат”, “Еңбек ері” т.б мемлекеттік наградалармен марапаттады.

Мерекелік жиын Маңғыстау облысы өнерпаздарының концерттік бағдарламасымен жалғасты.

• 27.10.2022
• 225