Маңғыстауда жүгіруден өткен жартылай марафонға мыңға жуық адам қатысты

25 қазан Республика күніне орай, КСРО-ның Еңбек сіңірген спорт шебері Әмин Тұяқовтың 85 жылдық мерейтойына арналған марафон өтті, деп хабарлайды Маңғыстау облысы әкімінің баспасөз қызметі.

Марафонның ашылу салтанатына Әмин Тұяқовтың өзі арнайы келіп қатысты. Биыл ҚР еңбек сіңірген қайраткері, Маңғыстау облысының құрметті азаматы 85 жасқа толды.

Әмин Тұяқовты қазақ жеңіл атлетикасының бастауы деп айтуға толық негіз бар. Осы саладағы рекордтары мен спортқа деген ерекше құрметінің арқасында оның аты жеңіл атлетика тарихында алтын әріптермен жазылды деуге болады.

Спорт саласының ардагер тұлғасын және жергілікті көрерменді осы спорттық мерекемен Маңғыстау облысының әкімі Нұрлан Ноғаев құттықтады.

- Мұндай ауқымдағы жүгіру марафоны Маңғыстауда алғаш рет өтуде. Осы дүбірлі додада бақ сынауға келген еліміздің өзге өңірлерінің спортшыларына, қонақтарға Маңғыстау өңіріне қош келдіңіздер деймін. Мемлекет басшысы Қасым-Жомарт Тоқаев ұлтаралық, дінаралық татулықтың берік болуы жөнінде жолдауларында жиі айтып келеді. Бүгінгі шара да соның бір айғағы. Себебі, спортта - ұлт, дін бойынша айырмашылық жоқ, тек шын мықтылық қана басты рөл ойнайды. Бүгін Қазақстанның түкпір-түкпірі мен өзге де елдерден мыңға жуық адам жүгіруге келіп тұр. Әрқайсымыздың ел дамуына қосар үлесіміз мол болсын, - деді облыс әкімі Нұрлан Ноғаев.

Марафон барысында белгіленген маршрут бойынша ерлер мен әйелдер арасында 16 жастан жоғары 10 шақырымда әуесқойлар, 18 жастан жоғары 21 шақырым қашықтықта кәсіпқойлар сынға түсті.

Жарысқа Қазақстан, Ресей , Украина, Әзірбайжан,
Түркия, АҚШ мемлекеттерінен жүгірушілер қатысты.

10 шақырымды бірінші жүгіріп өткен Ақтөбе облысының спортшысы Ислам Аманқос 1 орын, алматылық Нұрысбек Сексембай 2 орын, ал 3 орынды атыраулық Еркебұлан Аташов жеңіп алды. Ал қыздар арасында алғашқы болып Орал қаласының спортшысы Нұргүл Орынбасар, 2 орында алматылық Асем Кабдуш, 3 орында Ақтау қаласынан Арина Қуанышова жүгіріп өтті.

Ал 21 шақырымда кәсіпқойлар арасында алғашқы болып мәре сызығын алматылықтар, атап айтқанда Рақымжан Келманов пен Александр Антонов, Аман Нұркелді кесіп өтті. Қыздар арасында шымкенттік Ақбілек Құралбай 1 орын, ақтаулық Гүлнұр Елемесова 2 орын, Алматы қаласынан Гүлжанат Самигулиева 3 орын иеленді.

Айта кетейік, Әмин Тұяқовтың 85 жылдық мерейтойы аясында Маңғыстау облысында көптеген шаралар ұйымдастырылуда.

• 27.10.2022
• 254