Маңғыстауда даңқты спортшы Әмин Тұяқов жайлы ғұмырбаяндық кітаптың тұсаукесері өтті

Маңғыстауда жеңіл атлетика спортының танымал тұлғасы Әмин Тұяқов жайлы  кітаптың тұсаукесері өтті, деп хабарлайды Маңғыстау облысы әкімінің баспасөз қызметі. 

Әмин Тұяқов қазақ жеңіл атлетикасының бастауы болғандардың бірі. Ол - КСРО ойындарының бірнеше дүркін жеңімпазы, чeмпионы атанған, Кеңес Одағының рекордшысы, Еуропа кубогының иегері. 

Бұл жолы  Әмин Тұяқов Маңғыстауға  85 жылдық мерейтойы аясында ұйымдастырылған шараларға, сондай-ақ өзі жайлы кітаптың тұсаукесеріне арнайы келген.  

Кешке Әмин Тұяқов пен жары - Алма Досымбаева, Маңғыстау облысының әкімі Нұрлан Ноғаев,  мерейтой иесінің замандастары, үзеңгілес достары  қатысты.

Шара барысында Әмин Тұяқов жайлы қысқа бейнефильмдер мен жеке заттары, спортшы жайлы кітаптар қойылған көрме келушілер назарына ұсынылды.  

Құттықтау сөз алған аймақ басшысы Нұрлан Ноғаев даңқты спортшының елге сіңірген еңбегін ерекше атап өтті. 

-Әмин Тұяқов өмірі -  тәуелсіздігімізге жетер жолдағы спорттық тарихымыздың қастерлі  парағы. Ел абыройын аспандата көтеруге ұмтылған ол жас буынды ерлік пен батылдыққа жетелеген ізгіліктің айшықты үлгісі. Әмин Елемесұлының 1960 жылдардағы үлкен спорттағы телегей табыстары бүгінгі ұрпаққа зор мәртебе, үлкен мерей, үлгі екені даусыз. АҚШ-тағы додалар, Токиодағы, Римдегі ғасыр матчтарындағы Әмин ағаның айшықты көрсеткіштерінің даңқы  жыл өткен сайын зораймаса, кішіреймек емес. Спортшы ағамыз жайлы талай дүние жазылды, алайда бүгін тұсауы кесілген осы кітаптың өз орны бар. Себебі, Әмин ағаның кітапта баяндалған  өмірі жастарға үлгі болуы керек, - деді өңір басшысы Нұрлан Ноғаев.

Кеш соңында сөз алған мерейтой иесі Әмин Тұяқов көрермендерге ықыласын білдіріп, алғысын айтты. 

-Мен үшін Маңғыстауға келу - үлкен қуаныш. Бұл өлке менің - балалық шағым мен жастығым өткен туған жерім. Жыл сайын елге келемін. Өткен жылы келгенімде облыс басшысы Нұрлан Асқарұлы 85 жылдық мерейтойымның осында өтуін, мерейтойға орай кітап шығарылуы керек екенін айтты. Кітаптың шығуына, мерейтойымның жоғары деңгейде өтуіне ат салысқан Маңғыстау облысы басшысына алғыс айтамын, - деді Әмин Тұяқов. 

“Әмин Тұяқов” кітабы 1000 данамен  оқырманға жол тартты. Құрастырған - Жұмабай Құлиев.

• 27.10.2022
• 211