Маңғыстауда дәулескер күйші Сержан Шәкіраттың шығармашылық кеші өтті

28 қазан күні Ақтауда Сержан Шәкіраттың «Халық күйшісі халыққа шығады» атты кеші өтті, деп хабарлайды Маңғыстау облысы әкімінің баспасөз қызметі.

Кеш барысында сахнада Сержан Шәкіраттың өзінен арнайы сұхбаттар алынып, ол орындайтын күйлердің тарихы, кеш иесінің өмірінен азды-көпті мәліметтер берілді.

Тек қазақ даласын ғана емес, күй құдыретімен әлемді тебіренткен өнер иесінің кешінде сөз алған Маңғыстау облысы әкімі Нұрлан Ноғаев талант иесіне жүрекжарды жылы лебізін арнап, ыстық ықыласын жеткізді.

-Ұлттың ұлт болып ұйысып қана қоймай, мәдениеттің өскелең ұрпақтың санасына сіңірілуіне аянбай қызмет етіп келе жатқан қадірменді қонақтарымызға қош келдіңіздер деймін. Бүгінгі шығармашылық кештің иесі - Сержан ағамыз елдегі алдыңғы қатарлы күйшілердің бірі. Ол өзінің тектен дарыған табиғи талантының арқасында өнерде сүбелі табыстарға жетіп, өз аймағының ғана емес, бүкіл қазақ елінің атақ-даңқын көкке көтере байытып, әлемге паш етті. Абыл, Есір, Өскінбай, Қартбай, Есбай, Құлшар, Шамғұл, Мұрат, Әлқуат, Алым сынды халықтық дәстүрлі орындаушылықтың жалғастырушысы, көптеген көне күйлер мен әуендерді бойына сіңірген және фольклор саласының жеткізушісі.
Көптеген шәкірттер тәрбиелеп шығарды. Қазақстанның Халық жазушысы, Еңбек ері, Әбіш Кекілбайұлы жазғандай Сержан орындаған қай шығарма да тамсантпай, тебірентпей, теңселтпей қоймайды, - деді аймақ басшысы Нұрлан Ноғаев.

• 31.10.2022
• 221