Маңғыстауда ақын Рахат Қосбармақтың шығармашылық кеші өтті

29 қазан, Абай атындағы мәдени демалыс кешенінде белгілі ақын Рахат Қосбармақтың “Бесінші мұхит – берен жыр, Сегізінші бояу – өлең-дүр» атты шығармашылық кеші өтті, деп хабарлайды Маңғыстау облысы әкімінің баспасөз қызметі.

Кешке Маңғыстау облысының әкімі Нұрлан Ноғаев, ҚР Жазушылар одағының төрағасы Ұлықбек Есдәулет, халықаралық «Алаш» сыйлығының иегері Бауыржан Жақып және өзге де арнайы шақырылған қонақтар қатысты.

Кеш барысында облыс басшысы қазақ әдебиетіне үлес қосып жүрген ақынға алдағы уақытта да толағай табыстар, шығармашылық шабыт тіледі.

-Өлең бар жерде, өнер өлмейді. Барлығымыздың тілегіміз бен діттегеніміз - елдің тыныштығы мен болашағы. Мемлекет басшысы да ресми, бейресми сөздерінде азаматтық қоғамды дамыту қажетін баса айтады. Баршамыз бір-бірімізге қолдау білдіріп, ел үшін бірге жұмыстанайық. Рахат Құсайынұлының бүгінгі шығармашылық кешіне қолдауларын білдіріп, Астанадан, Алматыдан келіп отырған қазақтың қаламгерлеріне алғыс айтамын. Рахат ақынға шалқар шабыт, зор денсаулық, отбасының құт-берекесін тілеймін, - деді аймақ басшысы Нұрлан Ноғаев.

Жыр кешінде Рахат Қосбармақтың сөзіне жазылған Марат Ордабаев, Рахат Мадреев, Ерекен Қорабаев сынды композиторлардың әндері орындалып, мектеп оқушылары ақын өлеңдерін жатқа оқыды. Фойеде ақынның өмірі мен шығармашылығына арналған кітаптар мен фотолардан құралған көрме, ақынның жазу үстелі инсталляциясы бар көрініс көрермендер назарына ұсынылды.

Кеш соңында өзге өңірлерден арнайы келген ақын-жазушылар Рахат Құсайынұлын мерейтойымен құттықтады.

• 31.10.2022
• 230