Ақтөбе облысында 15 мыңнан астам адам бір мезетте Қазақстанның Гимнін орындады

Ұлттық мерекеге арналған «Бір Тудың астында» акциясы Ақтөбе қаласымен қатар облыстың барлық аудандарында өтті.

Тұңғыш Президент атындағы саябақта өткен шараға Ақтөбе облысының әкімі Ералы Тоғжанов, еңбек ардагерлері, мәслихат депутаттары, Қоғамдық кеңес мүшелері, қоғамдық ұйым өкілдері, белсенді жастар, мемлекеттік мекеме басшылары, барлығы 1000-нан астам адам қатысты.

Акция барысында мемлекеттігіміздің мызғымастығын білдіретін Мемлекеттік Туды көтеру рәсімі өтіп, бір мезетте қазақ халқының азат рухы мен ұлттық болмысын жырлаған әнұран орындалды. Сонымен қатар, 12 ауданда ұйымдастырылған патриоттық мәні зор салтанатты шараға 15 мыңнан астам адам қатысты.

Атап өтейік, өңірде Республика күніне арналған шаралар 3-қазаннан басталған болатын. Қайырымдылық, экологиялық, патриоттық шаралар ұйымдастырылып, әлеуметтік және спорттық нысандар пайдалануға берілді.

Мәселен, Алға ауданының алты елді мекенінде суды тазартатын кешенді блок-модульдер орнатылса, Мәртөк ауданында электронды қызмет көрсету орталығы ашылды. Қарғалы ауданында белсенді ұзақ өмір сүру орталығы, Шалқар ауданында салауатты өмір салтын қалыптастыру орталығы есігін айқара ашты. Байғанин және Алға аудандарында спорт және ойын алаңдары орнатылды. Мұғалжар ауданының Қандыағаш қаласы мен Сағашилі ауылында көпсалалы ашық спорт алаңдары, Шеңгелші, Қожасай ауылдарында су құбырлары пайдалануға берілді. Темір, Қарғалы аудандарында жаңа спорт нысандары бой көтеріп, Алға ауданының Жерұйық, Қарағаш, Маржанбұлақ, Үшқұдық ауылдарындағы жолдарды орташа жөндеу жұмыстары аяқталды.

• 31.10.2022
• 264