Ұлттық экономика министрлігі «Агломерацияларды дамыту туралы» Заң жобасын таныстырды

Парламент Мәжілісінде Ұлттық экономика вице-министрі Бауыржан Омарбеков «Агломерацияларды дамыту туралы» Заң жобасын таныстырды.

Заң жобасында «агломерация» терминінің анықтамасы енгізіледі. Агломерацияларды басқарудың жаңа моделі құрылады. Республикалық деңгейде агломерацияларды дамыту жөніндегі мәселелер Үкімет жанындағы консультативтік-кеңесші орган болып табылатын Агломерациялар жөніндегі кеңестің қарауына шығарылатын болады.

Өңірлік деңгейде агломерация аумағын үйлестірілген дамытудың нақты мәселелерін шешу үшін қаланың және іргелес облыстың жергілікті атқарушы органдарының өзара іс-қимыл алаңы ретінде Жергілікті агломерация кеңестері құрылатын болады.

Өңірлердің әкімдіктеріне 25 қосымша өкілеттік беріледі:

Агломерация аумағында жергілікті маңызы бар мәселелерді бірлесіп шешуге қатысу

Тиісті келісімді дайындау және оған қол қою

Жергілікті агломерация кеңесін құруға және оның қызметіне қатысу

Агломерацияны дамытудың кешенді жоспарын әзірлеу

Бұл өкілеттіктер орталық қала мен қала маңы аймағы арасындағы экономикалық дамудағы теңгерімсіздіктерді еңсеруге мүмкіндік береді.

Астана, Алматы және Шымкент қалаларының жергілікті атқарушы органдары субъектілердің келесі қызметтерін үйлестіреді:

Орталық қалаларды дамыту мен салудың бас жоспарын және қала маңы аймағын қала құрылысын жоспарлаудың кешенді схемасын іске асыру

Астана аумағын, республикалық маңызы бар қалаларды және олардың қала маңындағы аймақтарын дамыту мен салудың бас жоспарының жобасын әзірлеуді ұйымдастырады.

Қала маңындағы аймақтарының аумағында қолданылатын сәулет, қала құрылысы және құрылыс қызметі саласындағы мемлекеттік нормативтердің жобаларын келіседі.

Ұсынылған нормалар жоспарлауды синхрондау, қала-орталықтың қала маңындағы аймағында орналасқан елді мекендердің аумағын тиімді пайдалану, жер учаскелерін келісілген пайдалану үшін қажет.

«Республикалық маңызы бар қалалар мен астана әкімдіктеріне бүкіл агломерация аумағында әлеуметтік жобаларды бірлесіп қаржыландыру мүмкіндігін беру іргелес облыста мектептердің, ауруханалардың және т. б. тапшылығының, сондай-ақ қалада осындай әлеуметтік объектілердің қайта жүктелуінің өткір проблемасын шешуге мүмкіндік береді», - деп түйіндеді Ұлттық экономика вице-министрі.

Жалпы, ілеспе заң жобасында Бюджет және Жер кодекстеріне, сондай-ақ қолданыстағы 5 Заңға өзгерістер енгізу жоспарлануда.

• 01.11.2022
• 249