Әлібек Қуантыров Шымкенттегі өнеркәсіптік нысандарды аралады

Бүгін ҰЭМ басшысы жұмыс сапары барысында «Оңтүстік» индустриялық аймағының аумағында орналасқан кәсіпорындардың қызметімен танысты. Атап айтқанда, министр «ЕвроКристалл» шыны ыдысын өндіру зауытында болды.

Оны салу үшін «Бизнестің жол картасы» бағдарламасы шеңберінде индустриялық аймақ аумағында жер учаскесі бөлініп, инфрақұрылым тартылды. Кәсіпорын 300-ден астам адамды тұрақты жұмыспен қамтамасыз ете отырып, тамақ және фармацевтика өнеркәсібі үшін жылына 200 млн. астам шыны ыдыс шығарады. Жобаның құны – 3,8 млрд. теңге.

Сол жерде министр «QAZALPACK» жеңіл металдардан орау материалдарын шығаратын зауытқа барды. Мемлекет зауытқа «Қарапайым заттар экономикасы» бағдарламасы шеңберінде банктік қарыздың пайыздық мөлшерлемесін субсидиялайды.

Кәсіпорынның құны 23,4 млрд. теңгені құрайды, оның жобалық қуаттылығы сусындарға арналған 500 млн.дана алюминий банкалар мен қақпақтар жиынтығын шығаруға мүмкіндік береді. Өткізу нарықтары – Қазақстан, Өзбекстан және Қырғызстан. Заманауи жабдықтар мен өндіріс процестерін толық автоматтандырудың арқасында зауыт минутына 3000 дана өнім шығарады. Зауытта 150 адам жұмыс істейді.

Жұмыс сапары аясында Әлібек Қуантыров «Жұлдыз» индустриялық аймағының құрылыс барысымен де танысты. Онда 5 мыңнан астам жұмыс орнымен қамтамасыз ететін 50-ден астам ірі жобаны іске асыру жоспарлануда.

«Shymkent» әлеуметтік-кәсіпкерлік корпорациясы» АҚ филиалының директоры Нұралы Арғынбаевтың айтуынша, бүгінгі таңда «Жұлдыз» ИА құны 130 млрд.теңге сомасын құрайтын 23 жоба орналастырылған. Инженерлік желілердің құрылысын аяқтау үшін республикалық бюджеттен 2,5 млрд. теңге қажет.

Өз кезегінде, ҰЭМ басшысы шығыстардың қалған бөлігін қаржыландыру 2023 жылға арналған республикалық бюджетті нақтылау шеңберінде заңнамада белгіленген тәртіппен қаралатынын атап өтті.

• 02.11.2022
• 263