Ақтауда өткен дирижерлар байқауы Рахат Мадреевтің шығармашылық кешімен қорытындыланды

Ақтауда Боздақ  Рзаханов  атындағы «Сиқырлы таяқша» IV республикалық   дирижерлар  байқауының жабылу салтанаты мен дирижер Рахат Мадреевтің 60 жасқа толуына орай «Өмірім – өнерім» атты шығармашылық кеші өтті. 

Боздақ Рзаханов атындағы дирижерлар сайысы 2011 жылдан бастап дәстүрлі түрде  ұйымдастырылып келеді. Биыл төртінші рет өткізілуде. Барлығы 16 қатысушы өнер көрсетті, оның төртеуі Маңғыстау облысынан. 

Биылғы байқау қорытындысы бойынша аталған  байқаудың 
III-орын  және лауреат атағымен Жанат Рашит, Жарас Сатыбалдиев, Ерлан Дәуренбеков марапатталды. ІІ орынды Есенжан Мұстафин, Медет Есбергенов алды.

I орын лауреаттары атағына  М.Өскінбаев атындағы облыстық филармонияның кіші симфониялық оркестрінің дирижеры Әлібек Мұратов және  Қ.Байжанов атындағы концерттік бірлестіктің дирижеры Әбілқайыр Сағымбаев ие болды. 

Мерекелік концертке Маңғыстау облысының әкімі Нұрлан Ноғаев,   Боздақ Рзахановтың жары Рахат Тәжіғалиқызы және республикаға танымал дирижерлар, жас өнерпаздар қатысты.  

 Нұрлан Ноғаев дирижерлік өнерді жастарға насихаттауда бұл байқаудың орны ерекше екенін атап өтті.

- Құрметті халайық, байқауға қатысушы өнерпаздар, бүгінгі кешке қош келдіңіздер. Елге тұлға бола білген ата-бабаларымызды дәріптеудің ұрпақтар сабақтастығы үшін маңызы өте зор. Солардың бірі - ерекше дарын иесі, өмірін өнерге арнаған, қайталанбас дара тұлға, өнер иесі Боздақ Рзаханов. Боздақ ағамыз – Маңғыстау топырағынан шыққан кәсіби дирижер және домбырашы, оркестр ұйымдастырудың шебері. Осындай дара тұлғаның құрметіне ұйымдастырылған сайысқа өзге облыстардан қатысуға келген 16   өнерпазға да алғыс айтамын.  Жүлделі орындарыңыз құтты болсын, өнер көкжиегінде шығармашылық табыс тілеймін. Осы байқаумен тұспа-тұс келген тағы бір өнер мерекесі - Рахат Бекболұлының шығармашылық кеші өте жоғары деңгейде өтті. Өнер жолындағы ұрпаққа берер тәліміңіз алдағы уақытта да жалғаса беретініне сенімдіміз. Әрдайым осындай рухани кештерде жолыға берейік.  Рахат Бекболұлы, адам өмірінің айтулы белесі – 60 жас мерейтойыңызбен құттықтаймын. Сізге сарқылмас шығармашылық шабыт, еңбегіңіздің жемісін тілеймін. Әрдайым осындай рухани кештерде жолыға берейік, - деді аймақ басшысы Нұрлан Ноғаев.

• 04.11.2022
• 339