Солтүстік Македонияға жұмыс сапары барысында Ұлттық экономика министрі бірқатар екіжақты кездесулер өткізді

Скопье қаласында Әлібек Қуантыров Солтүстік Македония Ассамблеясының (Парламент) Төрағасы Талат Джаферимен кездесті.

Кездесу барысында сауда-экономикалық ынтымақтастық мәселелері, оның ішінде инвестицияларды өзара ынталандыру және қорғау бағыттары талқыланды. Тараптар Қазақстан мен Солтүстік Македонияның көптеген бағыттар бойынша бірлескен жобаларды іске асыру үшін зор әлеуетке ие екендігіне сенім білдірді.

Сондай-ақ, ҰЭМ басшысы Солтүстік Македония Республикасы Премьер-Министрінің бірінші орынбасары, саяси жүйе және қауымаралық қатынастар министрі Артан Грубимен келіссөздер жүргізді.

Тараптар екіжақты ынтымақтастықтың келешегін талқылады. Атап айтқанда, тұрақты экономиканы қалыптастыру, бизнесті дамыту, инвестицияларды тарту және «жасыл» экономиканы ілгерілету мәселелері қозғалды.

Сонымен қатар, министр Тетово қаласындағы техникалық-өнеркәсіптік даму аймағына барды. Онда қазақстандық делегацияға бұл аймақтың артықшылықтары мен мүмкіндіктері таныстырылды. Мұнда 10 жылдық салық демалысы, қосылған құн салығынан және тауарларды импорттау кезінде кедендік баждардан босату қарастырылған. Негізгі бағыттар - «жасыл» энергия саласындағы жоғары технологиялық жобалар.

Сонымен қатар, жұмыс сапары барысында ҚР Ұлттық экономика министрі жергілікті Инновациялар және технологиялық даму қорының директоры Фестим Халилимен кездесті.

Қор жеделдетілген технологиялық даму және жаңа жұмыс орындарын құруды қамтамасыз ету үшін шағын және орта кәсіпорындарды қолдайды.

Өз кезегінде қазақстандық тарап цифрлық даму, венчурлық қаржыландыру, сондай-ақ стартаптарды қолдау бойынша нәтижелерін ұсынды.

Македониялық мамандар тәжірибе алмасуға және инновациялық технологиялар саласындағы ынтымақтастықты одан әрі дамытуға қызығушылық білдірді.

• 09.11.2022
• 195