«Даму» Қорының Басқарма төрайымының Атырау облысына жұмыс сапары

«Даму» Қорының Басқарма төрайымы Гаухар Бурибаева Атырау облысына барды. Жұмыс сапары барысында Қордан қолдау алған әлеуметтік маңызы бар бірнеше кәсіпорын жұмысымен танысты.

Бірінші аралаған нысан: «ГринСитиКлининг» ЖШС. Компанияның өндіріс және тұтыну қалдықтарын қайта өңдейтін кешен салу үшін алған несиесін Қор «БЖК-2025» бағдарламасы аясында субсидиялап, пайыз жүгін жеңілдеткен. 

Одан кейін «Даму» Қорының төрайымы «SOVA» зияткерлік мектебіне бас сұқты. Назымгүл Сағыналиева ашқан бұл мектеп «SAPSAN» интеллектуалдық дамыту кешенді бағдарламасын қолдана отырып НЗМ әдіскерлері мен Ломоносов атындағы ММУ түлектері бірлесіп жасаған Ресей-Қазақстан бренді. Кәсіпкердің ғимарат сатып алу үшін 18%-бен алған несиесін Қор «Ұлттық жоба» бағдарламасы аясында субсидиялап, 6%-ға түсірген.

«Studbolt Manufacturing» – мұнай-газ, мұнай-химия, энергетика және құрылыс салаларына болт, бекіту материалдарын өндіріп, жеткізудегі көшбасшы кәсіпорын. Бұл – шпилька, алты қырлы болт, винттар мен анкерлі (іргетас) сияқты көптеген болттар шығаратын Қазақстандағы жалғыз зауыт. Өндірісті кеңейту қажет болғанда компания «БЖК-2025» мемлекеттік бағдарламасы аясында несиесін субсидиялады.

Сапар соңында төрайым құрылысқа арнап фиброполистиролбетон блоктар, ыстық-суық өткізбейтін әрлеу және сәндеу материалдарын, гиперпресстелген кірпіш пен сәндейтін кірпіштер, сэндвич панельдер, композитті шыныпластик арматура және жиһаз қасбеттерін шығаратын «Теплый Дом Атырау» серіктестігін аралады. Компания «Даму-Өндіріс» бағдарламасы аясында жеңіл несие алып, «БЖК-2025» бағдарламасына аясында несиесін субсидиялаған.

Осы кезге дейін «Даму» Қоры Атырау облысы бойынша несие сомасы 418 млрд теңге болатын 8000 жобаға қолдау көрсетті.

• 14.11.2022
• 283