Ұлттық экономика министрлігінде ЭЫДҰ-мен ынтымақтастық мәселелері талқыланды

Астанада ҚР ҰЭМ басшысы Әлібек Қуантыров Экономикалық ынтымақтастық және даму ұйымы (ЭЫДҰ) Еуразия бөлімінің басшысы Уильям Томпсонмен кездесті.

Тараптар екіжақты ынтымақтастықтың қазіргі жағдайы мен даму перспективаларын талқылады.

Атап айтқанда, 2023-2026 жылдарға арналған жаңартылған Іс-қимыл жоспарын қамтитын ҚР Үкіметі мен ЭЫДҰ арасындағы өзара түсіністік туралы Меморандумға өзгерістер енгізу щеңберінде Хаттама дайындау туралы сөз қозғалды.

Сондай-ақ, бірлескен жобаларды іске асыру, оның ішінде елдің экономикалық жүйесінің ЭЫДҰ стандарттарына сәйкестігін талдау үшін бірқатар тақырыптық шолу жүргізу, Ұйымның құқықтық құралдарына қосылу мәселесі талқыланды.

Кездесу барысында Ә.Қуантыров шағын және орта бизнесті қолдау және инвестицияларды тарту бойынша жүргізіліп жатқан реформалар туралы айтып берді.

«Қазақстан ЭЫДҰ стандарттарын кезең-кезеңімен енгізу бойынша белсенді жұмыс жүргізуде және оған барынша мән береді. Біз 2025 жылы ЭЫДҰ-ға кіруге өтінім дайындауды жоспарлап отырмыз. Мақсат тек Ұйымға кіру емес. Ең бастысы - ЭЫДҰ стандарттарын қолдана отырып, азаматтардың өмір сүру деңгейі мен әл-ауқатын арттыру, бизнес жүргізу жағдайын жақсарту және тұтастай алғанда, елді дамыту», - деді Ұлттық экономика министрі.

Кездесу қорытындысында тараптар барлық маңызды бағыттар бойынша белсенді өзара іс-қимылды жалғастыруға келісті.

• 14.11.2022
• 235